Memeshiba rongsen

Taoba hopta nung asenoki iba osangkaket nung ” sen kong nungi aruar kuli magütsütetba tenla senbo arogoi magizük nunga koma süla ?” ta asüba onük nung bilemdangogo. Kenü anogo nisung kati arogo ka nem tenla ki yanglutsü asoshi tenla sen lakh ter bener arua agütsü. Mulungsua tenla agütsü nungji arogoi iba senji kong nungi anguba sen agütsür ta kecha masüngdangi  pelashishia agizük aser tagizüker dang nungibo tagütsürang temoatsüba süang ta sarasademtsür yok. Ajisüaka, iba sen to sorkar senpong nungi sensaker makamaitertem  yaritsü asoshi yokba sen nungi miima sen crore ka agizüker ter shilem agütsürba liasü. Iba ama senji arogoi agizüka amshitsübaji tim na (?) ta asenok arogo nunger ajaki shisadangtsübaji tanü tensa aser asenok inyakyim agi akanger. Tatishitsü agi, arogo nungeri tenla agütsür dang to sen lakh terji kong nungi anguba sen ta asüngdang aser tagütsür jagi, tiyazü ka, ni business ka inyakba nungi tajangzük anguba sen nungi tenla abener ta ashi, anungji arogoi pelashishia agizük. Ni bilemer, iba nungjibo arogo nunger shitak asütsü saka tagütsürang tenla agütsü dang tai ana menar asütsü. Iba amaji shibai kechi tenla bendir benaka iba senji kong nungi anguba sen-ar iba kuliji zülur agütsütsüla. Iba jagi arogo nung tenla arubabo ajemtsüa akok saka tenla aruba ajemba den külemi yimten nunga ochimashi ajemtsü. Arogo tentetba nükjidong ya tenla mashimashi bendena tenla ki tajung yanglutsü mesüra iba ama sen jagi mission mapa inyaktsü asoshi masü saka tamangertem longjemer ochishia Tsüngremer tenyaba mapa inyaktsü asoshi tentetba lir. Ajisüaka, asen lima nungbo sen kongi aruar kuli magütsütetba tenla arogoi magizüktsübajibo talangka nung yutsür, arogoing yimten yimsüsür aser ketdangsertem tai menadakja tenla ki asütsü asoshi aser mission mapa inyaktsü asoshi tenla tulu meshibaji Tsüngrem tsüngdangbo temenünütsüka asütsü. Tsüngrem mapa yabo ochi aser tamang agi inyaker saka sorkar sen tim masüba nung agizüka amshia Tsüngrem mapa inyakbaji amajok rongnung amajok asütsü. Angazükba agi, Mizoram nungbo tenla agütsüaka, ibaji kong nungi aruar kuli magütsütetra arogoi magizüker. Anungji, arogo nungertem ajak pei mapa nung meranga inyaker tenla tajung abentsü ajungshir. Iba jagi arogo purtem tenla abenba nung tai memenadaktsür. Mizoram nungsa ano asenoki ajizüka benshitsüba mapa tajung kaji, Khristmas mapang nung arogoi külemi alir mamangba purtem dena jaoka külemi chiyongteper. Ibajia arogoi Yisu Khistai bener aruba osangtajung indang kuli süba sentong tajung ka lir. Ashiko, asenokibo Khristmas anogo nung asenok chiyonga alidak tsümar mesüra mamangba purtem kar arunungbo meindoktsü südi. Aji oda, tang tashi asenok tangatetbabo  ochimashiba sen medenra tenla ki mesütettsü, tenzükertem nem ita sen magütsütettsü aser mission mapa dena meinyaktettsü ta asüba tangatetba aser shisabolu lir. Atangji, aji shitak, kechiyong ochimashiba sen agi dang asenok arogo rongsen nung takar akümer, saka iba jagi tanüla nungbo sensaker. Tanü asenok tenla ki tajung tululu yanglua yur sarasadem asütsüa azümasen akümba ajakji asenok arogo ochimashi tashi nung amendaka aliba ajanga lir. Kechiba asenokbo yimten nunga mapa meinyak ser sen aika agizüka agitsüang merangtsü ? Kechiba asenokbo lokti tentet ajak meinyaki zübazübaa anguba sen agi taküm alitsü merangtsü ? Kechiba asenokbo ochimashi lenmang nungi anguba rongsen agi arogo takar akümtsü merangtsü ? Item tasüngdangbatem yagi asenok ajak mulung nung jembidaktsütsüla. Tanü asenoki ochimashi len nungi anguba sen aika zübazüba angubaji temoatsüa ta bilemer. Ajisüaka, iba jagi arogo nung sensaker tesensakba kümdaktsür aser tenzükertem azümasen kümdaktsür. Ochi mapa inyaktsüba ya arogo nungi metenzükra, yimten  nungbo ochi laogo. Joko ochishirbo tamendak maka saka ochimashirbo nübortemi ali nunga mejajadaktsü tushia apur senzüba mapang lir. Iba ama mapang ka nung arogoi ochimashi anema timtem aser takoksa arema nokdaktettsüla.