Memon alensetogo aser Mumbai nung remogo

Nagpur/Mumbai, July 30 (Agencies): 1993 küm Mumbai nung bomb aika pokdakja amakba ken o nung küm 22 lir sülen tanü Nagpur Central Jail nung Yakub Memon pa arishi küm 53 ajungba anogomung nung alenseta südaktsüogo.

Memon-i pa tasüba agi merenshitsü aliba mapang atsülangtsü asoshi mepishibaji Supreme Court obendanger asem- Dipak Misra, Prafulla Chandra Pant aser Amitava Roy nungeri magizükba sülen par asem nem security akhanga agütsüogo.

“Ochi temeten aginer ka nem sabang balala nung maongka ajak agütsütsüla, aser Yakub-i sabang ajak nung maongka agitetogo. Anungji kiralongraba dak sentakba onüktem nungbo asenok lungjema alitsüla,” ta tanü Union Home Minister, Rajnath Singh-i ashi.

Memon-i pa asütsü lia tesüsabuba inyaknübaji, arishi küm 21 jala ajurunüa liasü saka telephone ajanga dang jembitsü mela, ta jail ketdangsertemi ashi.

“Par jala den jembiba sülen pa kanga pelaa liasü,” ta jail ketdangser kati ashi.

Yasüng 9:30 ako nung Memon nem anshi aser amtsük (roti) agütsü saka pai an tepi ana den amtsük ka dang achi, aser tanep pa asobamung nüngtem nung pa nem cake ka agüja liasü.

Pa alenseta südaktsüba tatongi yamai liasü: Tanep 3:30 ako nung Memon saakba sülen tzü chigotsü mela aser pa nem süoshi agütsüba den sarasademtsü mapang agütsü, Memon-i taochi meshiba shidi 2:30 ako nung angadanga liasü aser iba temepsihiba magizükba osangji 5:02 ako nung metetdaktsü, 5:30 ako nung pa nem chiyungtsü agütsü saka pai kecha machi,  6:23 ako nung Memon’er kibongi pa tasümang aginer ta mepishi, 6:25 ako nung Nagpur yimti nung section 144 amenok, 6:35 ako nung Memon lisü agi alenseta südaktsü, 7:01 ako nung Yakub Memon süogo ta Jail ketdangsertemi metetdaktsü, 7:27 ako nung tasümangji par kinünger nem agütsütsü ta Maharashtra Home Department-i metetdaktsü, 7:52 ako nung ketdangsertemi Memon’er kinüngertem dang, asüpila sentongji mapang telatet ka nung agitsü, lokti yimdongsüa mejajatsü aser yimjak nung noksa tangokba mesayatsüla ta latetsüba sülen 9:49 ako nung tasümangji agütsü aser tesüsa nikongdang 12.15 ako nung Memon tasümang abenba tayimtsü Mumbai atongba sülen 6:00 ako nung Mumbai nung aliba Bada Kabrastan nung tasümangji rema toktsü.

1993 küm Mumbai amakba sentong asameyangba aser senotsü agi yariba ken o nung Menon aija liasü. Iba lendong nung nisung 257 tashi pokset aser nisung 700 dak tema yurua liasü.

Nagpur Jail nung küm 31 sülen mezüngbuba alenseta südaktsüsangji Yakub Memon lir aser tesüiba küm 10 nung linük nung alenseta südaktsür pezübuba lir.