Memon asoshi aria bilemtsübaji linük anema lir: Naidu

Hyderabad, August 02 (Agencies): Deobar nü Union minister Venkaiah Naidu-i, nisung kari tasüba obendang aser kiralongraba nung ken o aputsü meranger, aser Yakub Memon asoshi aria bilemtsüra ibajibo linük anema lir, ta ashi.
1993 Mumbai amakba ken o nung aija tawa Yakub Memon alenseta südaktsüogo.
“Tia makai, nisung kari tatalokba ajak nung yimtenren ken o aputsü meranger,” ta Naidu-i ashi. Tasüba agi merenshitsü obendang aser kiralongraba naji balala aser nüburtemi iba nungji o atsüteptettsü, ta paisa ashi.
“Ajisüaka, kiralongraba anema raraba nungbo, asenoki akokba tashi agi inyaktsüla. Kiralongraba ajanga tesamatsüba jenti ajurutsübaji asenok lir. Parnoki asen rongsenkettsüng jenjang raksatsütsü aser linük tashi meitdaktsütsü meranger. Kiralongraba onük nungbo temerenshi tajemba agütsütsü mesüra anep-asünga inyaktsüji madoker,” ta Naidu-isa ashi.
Yakub alenseta südaktsüba nung o atsütepba mapang ka nung Naidu-i, “Yakub Menon (südaktsüba) atema nisung kari o atsütepba asoshi ni süngmanger. Pa ya linük ashioktsür ka, kiralongrar ka lir, aser pai linük mejungi raksatsüogo. Pa nem tim tagütsütsü maongka ajak agütsüba sülen iba temerenshi agütsü,” ta ashi.
“Ajisüaka nisung kari iba ya meimchir temeten den sentakteptsü meranger aser kari tamangba yimsü den sentakteptsü meranger. Kiralongrartem atema tamangba yimsü mesüra kin telemsa mali. Kiralongrar kaji kiralongrar. Pa asoshi kari aria bilemtsütsü merangra, ibajibo asenoki linük anema inyaker lir,” ta paisa ashi.
Tawa Union home minister Rajnath Singh-i, taoba UPA sorkari “Hindu kiralongraba” ta oren amshi ta aitsüba dak sentakba nung pai, “Onoki kodanga Muslim kiralongraba, Khristan kiralongraba mesüra Hindu kiralongraba ta metetshir. Kiralongrabaji kiralongrangba ta tetshir aser iba ya meimchir asoshi tsükchir lir,” ta ashi.