Men in Black Actor Rip Torn arishi küm 88 nung süogo

Chiteni/July 10, 2019 (Agencies): Emmy award ngur alisang actor Rip Torn, shiba yimya balala ka asüba ajanga screen aser stage nung akaji kanga sakloka liasü aser iba yimya ajangsa set aser jurila taküm nung aiben mepetmesü adoka liasü, pa arishi küm 88buba nung Mongolbarnü süogo, ta media sangdong ka ajanga metetdaktsü. Torn, shibai US television’s The Larry Sanders Show aser Men in Black o Dodgeball movie nung tongti shilem agiogo pa par kidang sunep sunepa süogo, ta par kinungertemi Hollywood Reporter aser tanga media tem nem metetdaktsü.
Pa asüba kuli tejangja magütsü saka pa, kinungtsü actress Amy Wright aser jalatem ajak lia pa asü, ta media sangdong ajangsa metetdaktsü.
Torn taküm aliba mapang nung pai shilem balala tajung aika agiogo aser pa teseplep nisung ka shilem aser nisungtemi mimlaba shilem ka agitsü kanga tapet liasü.
Pa yimya mazüoktetba ajanga osang tem nung aiben adoka liasü. Pa Macbeth indang production nungi aninba atema President Richard Nixon administration aija liasü shiba shilem pai television mini-series Blind Ambition nung agia liasü.
Iba sülen pa yi ajemba dak sendakba nung 2010 küm apu. Pai Salisbury, Connecticut nung par kia ta bilemer bank shibanger aliba ka kakpoka aiba atema apu. “Ni mela mela jashir aser mapa balala ajanga mela mela jashir,” ta pai kaket zülur Studs Terkel ta shia liasü.
Torn-i ashiba agi, pa item emotion tem tajangzük atema amshitsü asoshi acting nung shilem agi tenzük. “Rip dak tashi balaka liasü, koba nai act mesütettsü,” ta playwright Horton Foote-i ash, shibai pa indang play The Young Man From Atlanta nung Torn nem shilem agidaktsü aser Torn kinungtsü tanabuba Geraldine Page den mapa aben inyaka aruogo, ta New York Times sangdong ka ajanga metetdaktsü.
Torn-i Men in Black movies ana tashi nung Zed shilem agiogo. Paisa NBC sitcom 30 Rock nung shilem tajung agiba ajanga Torn 2008 küm Emmy atema nominate süa liasü.