Menden atsüngdoktsü tasa küm asem tejaklen tenzüker liasü: Sharif

Lahore, August 13 (Agencies): Taoba Pakistan Ato Kelonser Nawaz Sharif menden nungi Supreme Court ajanga aludaktsüba ya mezüngmeshi mapa ka lir aser iba tasa ya küm asem tejaklen tenzüker liasü, ta pai ashi.
Gujranwala yimti nung pa indang rally ka nung jembidang arishi küm 67 tain, Sharif-i pa indang busemertem dang tarutsü nung Pakistan ato kelonser inyaktsü shimtetba nisung mezüngmeshi masütsü asoshi nangzüktsü ajungshi.
Panama Paper temai adokba ken o nung ajemdaker Sharif-i ochimashi inyakba ajanga pa aser par tanurtem anema ochimashi ken o benoktsü, ta aija nisung pongu-i akümba Supreme Court bench kati taoba ita pa ato kelonser menden nungi anendaktsü.
“Ni atsüngtoktsü tasa ya küm asem-ser tesadang jakdang tenzüka liasü aser parnoki ni mezüngmeshia atsüngtokogo. Ni ashikülaker nisung masü. Ni Pakistan meimer ka lir,” ta Sharif-i ashi.
Sharif ya par ki aliba Lahore yimti nung pa menden nungi atsüngtokba asoshi longkak aittsü atema Bodhbarnü Islamabad toktsür ao aser alima nung ato kelonser kata Pakistan nung pa atsüngtokba ama meinyak, ta ashi.
“Pakistan ya tia maka linük ka lir, koba partition asüba sülen ato kelonser 18 tashi ka nema tenure tembanga meinyakdaktsü saka dictator asem tashi küm 30 dak tali linük nung yimsü süa aru,” ta pai ashi.
Sharif-i kidang ajemasünga mena malitsü, ta nangzük.
“Pakistan linük tasen kümshia ato kelonser yamai mezüngmeshi masütsü atema ni nokdaktsü. Ato kelonser term matemdang kidangi yokba yimya ya tang sa anentsüla. Aser iba ya nüburtem teyari ajanga inyaktsü,” ta Sharif-i ashi.
“Kü indang ken o ni nüburtem indang court-i bener aru aser parnok telemtetba nung ni anidak. Iba linük yimsü asütsü ya tashi alir atema masü saka linük nung aliba nütsüng million 200 indang temeden lir,” ta pai nüburtem dang ashi.
Pai 2018 election nung takok angutsü tsübuba ajanga pa anemertemi pa anendaktsü, ta Sharif-i shisem.
Supreme Court-i July 28 nung disqualify asüba sülen Sharif ya ato kelonser menden nungi alur Murree aser Islamabad nung lia pai par ki aliba Lahore yimti-i ba pusemertem den külemi aotsü renem.
Pa indang yimten yimsüsüba tashi sayutsü asoshi pai Islamabad nungi Lahore-i Grand Trunk (GT) Road ajanga apusor anogo asemnü buba lir.
Pakistan Muslim League- Nawaz (PML-N) ajanga ashiba agi Nawaz ya Gujranwala nung Deobar aonung anisüngzüktsü aser Lahore-i Hombarep apusotsü aser nikongdang 4:00 ako nung atongtsü imlar.