Menja Aponger Tatsükshishi

– I. Ngangshi Jamir, Mokokchung Village.

Alima balala nung Khristantem reshikangshiba indang osangkaket balala nung mapang shia adokba asenoki zünga arudagi. Item rongnung “Alima balala nung Khristantem reshikangshiba’ ta sür adianu Y. Imti Tzüdir-i (Dimapur) Tir Yimyim April 17, 2016 Adok Tapak 2 nung adoktsüba nungi olep pungo (Paragraph) nungi tenzüka kar agiteta agütsür:
Hindu nungertemi Khristantem reshikangshiba : Jharkhand State (India) nung Hindu nungertemi Khristan telok ka parnok sarasadema alidang prangpong, phu, koterang aser süngsü agi azük. Parnoki azükba agi nisung 6-bo hospital nung among. Aji süaka Khristantemi Yisu Khrista mekülemtsü aser Hindu yimsü amangtsü menangzük. Hindu yimsü sashia amangertemi Khristan aser Pastor ka densema parnok 30 Khrista dang sarasademra tepsettsü ta amokmeren. Parnok jagi Pastorba motorbike raksatsü, Associate pastorbaji atsür oagi Hindu Tsüngrem külemtsüla ta merenshi. Idangji tenla kidang nisung aika dak azük. Küm 60 tantsür ka la teka ana prongla kosüktsü. Jharkhand nungsa pastor ka kaset, Jharkhand Khunti District, Sandhi yimtak Pentecostal Arogo ka nung Pastor, Chamu Hasda  Purty (küm 54), Hindu nungertemi kaset. Pastor-baji kinungtsü tena kilung nung lia par kishi nung nisung kari akoshi aser shiranger kar atema sarasademtsütsü arur ta ashi. Pastor kinungtsü jagi kichiba nungi angudang nung nisung 3-4 shi army uniform agir rifle amer nokdaka angu. Kishi melaboktsü nung parnoki nungboka aiter pastorbaji idakji kaset.
Khristantem maochi-i merenshiba aser kangshia Hindu kümdaktsüba : Hindu yimsü nung akanga amangertemi Chhattisgarh State nung aliba Kohkamata Pentecost Arogo nung khristantem kanga kangshia züker aika hospital nung amung aser karbo kangshia Hindu yimsü amangdaktsü. Khristanpurtemji tenla kidang nungi atsüzüker süng agi azük aser sign südaktsü. Khristan yimsüji toktsütsü nangzükdaktsü. Police dang report asü saka sorkaria kecha meinyak.
Yimsü nung tenokdangba maliba, (freedom of religion) ya state kar nung memelar. Haryana nung district collector kati Khristantem tenla kidang senteptsü memela. Tamil Nadu nunga district collector-i sentep kidang sentepa mekülemtsü ozüng agütsü.
Hindu nungertemi Sarasadem sentep nokdang, Telangana state Mahapunagar district nung October 12, 2015 anogo khristanpur 40 shi sentepa tamanger ka kidang aonung 7:30 PM meta sarasadema alidang Hindu nungertemi ki rakboka aiter Khristantemji züka merenshi. Tetsür-tanur dak-a azük. Küm 25 tain tetsür ka shiba temang mazüngi liasü la daka azük aser tesülen tanurji Tebok nung asü.
Kasa tatalokbaji Delhi yimtiba nungi kilometer 35 shi pilar Khristan telok ka ki ka nung sarasadema alidang Hindu nunger telok ka aiter Khristantem dakji azük aser pur oa police station ka nung yutsü aser yamai ashi, “Ibai Hindu lima ka lir, nenok sarasademji onoki magizüker”.
2020 nungbo India lima Hindu lima ka asütsü (India a hindu Nation by 2020) : 2014 Lok Sabha election nung BJP-i aniba sorkar yanglu. VHP lenir Ashok Singhal-i ashi, “2020 nungbo India ya Hindu lima ka akümtsü” ano pai Sai Baba tekülemdaki aodang sai baba-i pa dang ashibaji, “2020 tashi nungbo India ya Hindu lima aser 2030 nungbo alima ajunga Hindu yimsü amangertem asütsü aser tang iba temelenshiji adokogo”.
Hindu nungeri sentong yamaji yanglur süra asenok Khristantemia kechi sentong ka yanglutsü? Yangi teshisadangtsü tuluka lir ta angatetdi.
India nung BJP sorkar aniba Hindu nungertemi Khristantem alimai meteta yamai odia reshikangshir, aiben tenla ki rongdoktsüba, nisungi matitsüsa reshikangshiba, alima dang ajakbo mesangdonger dangashi  India nung Khristantem reshikangshibaji anogo shia atalokdagi.
Aji süaka May 10, 2016 anogo Nagaland BJP pur lokti senden ka Cosmos Hall Mokokchung nung akadang state BJP tir Visasolie-i ashiba agi, BJP ya aikati Hindu tamanger telok ta jembiba ya olulu dang, iba O ya political party kari pei telok ajangzüktsü atema jembiba dang lir. BJP telok ya India linük temzüngi melaba ama nükjidong akaba National aser Political Party tejangja ka lir ta jangjashitsü.” BJP-i Khristantem anemer ta jembir saka ibaji tiyazü O lir ta paisa shisem.
Khristantem timba aliba state nung sentongtemji iba yimya nung sarasademer tenzüker, Muslim nunger timba aliba state nung yamaji par yimsü dak apet sentongtemji achaayanga inyaker, yamaji BJP-i tamangba yimsü ajak dang akümtsübua benshir ta paisa kuli kar densema ashi.
BJP party-ji India linük temzüngi melaba ama nükjidong akaba National Political party tejangja ka ta ajaki meteta dang lir. Aser BJP  ta ajaba party nüngja jagi Khristantemji reshikangshir masü saka BJP party nung adenba pur shirnoki sorkar yanglua bener aor item jagi state aika nung Khristantemji reshikangshir aser aji alimai ngua, meteta dang inyaker. Anungji “Menja Aponger tatsükshishi” ta tasü itta shiteter.
Ni kecha party nunga maden, ni Yisu dak amanger ka dang, Yisu dak amangertem reshikangshiba mapatem anema nokdaker aser jembir dang.
Khristantem reshikangshiba mapatem yabo Khristanpur ajaki aitsütsüla aser anema nokdaktsüla ta ayimoktsür.