Menoknok atalokba sülen Nepal tia tajungba makümer

Kathmandu, April 23, 2016 : Nepal nung tanurtemi balloon salazüka yokba sentong nung shilem agiba noksa nung angur. Nepal yimtiba Kathmandu Durbar Square nung küm ka tejakdang  menoknok agi asüba purtem bilemtet iba sentong ya ayonga amongba lir. Sentong nung adentsü asoshi Nepal nunger nisung meyirjang aika, menoknok agi yaküm raksatsüba Kathmandu Durbar Square nung adenshia liasü.  April 25, 2015 nü iba menoknok ajanga nisung 9,000 shi taküm samatsü.

Kathmandu, April 24 (Agencies) : Nisung taküm 9,000 samatsüba den sen billion dollar aika alang takoksa bentsür aruba menoknok, 7.9 magnitude nung anoker küm ka jungaka anünga aliba nüburtem asoshi Nepal sorkari temelenshi aser terenlok atema kecha balaka meinyaktet, ta osang kar ajanga metetdaktsüogo.
Iba menoknok ajanga akosatsüba yanglushitsü atema National Reconstruction Authority (NRA) tentet, ajisüaka parnok den ajuruteptsü mersüa tongteprateptsü kanga tasak. Iba den külemi parnoki inyakba nung sorkar terenemba kecha maliba agi nüburtemsa akoksar, ta yaküm menoknok agi kongshirtemi ashi.
Yaküm menoknok tesashi ajanga taküm samartem nüngtem nung park ka lapoktsütsü atema linük Tir Bidhya Devi Bhandari Deobarnü Barpak, Gorkha tongogo. April 25, 2015 nü menoknok anokdang iba tesem ya tiyong sür anok.
Lendong ajanga raksatsüba kitem yanglushitsü atema yimtenren nung telok balalai amoka inyaknüba ajanga inyakyim menur, ta Nepal yanglushitsü atema shisatetsang, chief secretary Leelmani Poudyal-i ashi.
Terenlok mapa inyaktsü atema lemtetlempong aser tentet atema CEO ka shimtsü atema ita toku tashi agia liasü.
“Küm pongu tsüngda nung onoki raksar aliba ki ajak yanglushitsü,” ta NRA CEO Sushil Gyawali-i metetdaktsüogo.
Lendong ataloker küm ka ajungnü linük nung aliba political party telok pezü-i Deobarnü nungi tenzüka Kathmandu tesem balala nung iba yanglushiba mapa tenzükogo.
Iba menoknok agi kanga mejungi amshiba district 14 nung nisung 9,000 shi taküm samatsü, nisung 22,309 dak tema yiru, ki 602,257 tashi samatsü, ki 185,099 tali mejungi raksatsü aser school tem nung classroom 35,000 khenyongi samatsü.
Tenla agütsünertemi sen billion dollar 4.5 agütsütsü nangzük ajisüaka tang tashi nung Nepal sorkari sen billion dollar 1 dang agizüka lir.
Nepal lima yanglushitsü atema bendenba sen nungi tang tashi nung noklang nung shilem asem-a mamshima yua lir, ta Nepal osangkaket ka ajanga metetdaktsü.
Barpak nung alir Megh Lal Ghale-i, “Ni joko sorkar teyari matatsü. Joko shingaia sorkar teyari angutsü matar,” ta ashi.