Menoknok Magnitude 9 agi Bangladesh aser India nung kongshitsü akok:Scientist

Dhaka, July 12 (Agencies) : Bangladesh aser kidanger linük India nung menoknok tesashi ka agi kongshitsü akok, ajisüaka kodang ataloktsüar iba mapang tejangjaji  tangtangbo meshitettsü, ta bushisündangertemi metetdaktsüogo.

Ganges aser Brahmaputra ayongtem indang delta telung nung tectonic plate ana lir aser iba nungji tashi tulu ka tsüngtena aliba onoki tejangja ngutetogo, ta scientist temi metetdaktsü.

Anungji iba tashi tulu ya pokma menoknok anok nungbo tajemba agia nisung million 140 dak kongshitsü, ta patnokisa shisem.

India aser Bangladesh na nung iba menoknok anokba tiyong (epicentre) nungi mile 62 (100 km) telongtet tashi nung aliba nübur million 140 dak iba lendong ya kongshitsü. Menoknok anoktsü aliba tesem ya sensaker nisung aika aliba tesem lir, ta scientist temi ashi.

Iba menoknok ajanga Bangladesh nung tetuyuba shitak nung masüba kitem, industry tulu aser gas agiteta amshiba tesemtem aika raksatsütsü, ta parnoki ashi.

“Ganges aser Brahmaputra indang delta telung nung ali kilometre 12 shi nüngdena lir aser menoknok anokdang iba aliji ango apokdang amshiba mom (gelatine) ama anokshitsü aser iba tesem nung aliba ki, lenmang aser nisungtem ali telungi atsüoktsü,” ta Dhaka University nung geologist Syed Humayun Akhter-i sangdong ka ajanga ashi.

Iba lendong yagi ali 24,000 square miles telungtet nung timtem agütsütsü, ta scientist temi ashi.

Iba menoknok agi teraksa ulura adokdaktsüba ajanga Bangladesh yimtiba Dhaka tali majungtsüsa akümtsü akok, ta Akhter-i ashi.

Ibai menoknok masü saka takoksa adokdaktsüba lendong tulu rongnung ka lir, ta bushisüngdangertemi ashi.

“Iba lendong tulu arutsü ya onoki mapang talangka nungi temulung melemi bilema liasü, ajisüaka onok ket nung ibai asadangtsü oset peria maliasü. Saka tangbo onok ket nung data aser asadangtsü atema oset aliba ajanga iba lendong koba tika ataloktsü itemji asadangteter, ta iba takzür rongnung lenir aser Columbia University indang Lamont-Doherty Earth Observatory, US nung geophysicist Michael Steckler-i metetdaktsü.

Menoknok anokba ajanga dang masü saka Ganges aser Brahmaputra ayongtem lenmang melenshiba ajangaka teraksa jenti bener arutsütsü.

Item tectonic plate tem nung benden aliba tashi ya küm noklang 400 shi nungi bendenba lir, ta Steckler-i ashi.

Iba menokdangtetba menoknok anokba mapang ali ya 8.2 Richter scale nung anoktsü aser iba anokbaji magnitude 9 tashi atutsü akok, ta Steckler-i metetdaktsü.

Iba tongutetba ya Nature Geoscience kaket nunga adoktsüogo.