Menoknok nungi Nagaland jenbua mali: Pankaj Kumar

Kohima, June 7 (TYO): Nagaland nung menoknok nungi jenbutsü inyakyim melii kiojen aika yanglur. Anungji, asen state nung menoknok tesashi nokra, ki aika chireptsü, ta Chief Secretary, Pankaj Kumar-i tanü ashi.
Nagaland State Disaster Management Authority (NSDMA)-i National Disaster Management Authority (NDMA) den yaritepa Incident Response System (IRS) indang training tenzükba sentong nung jembidang Pankaj Kumar-i iba olen ashi.
Anogo ananü atema training ya Capital Convention Centre, Kohima nung agir aser Chief Secretary, Pankaj-i ashiba agi, Nagaland ya Earthquake Seismic Zone-V kübok lir aser menoknok tesashi anok nungbo ki aika chireptsü, kechiyong Nagaland nung ‘earthquake resistant technology’ medeni kitem yanglur.
Nagaland nung April nungi September tashi tzünglu arur aser October nungi March tashi tzünglu marur. Iba mongpu anaprong nung alima lendong balala ataloker. Tzünglu aruba mapang state kübok tesem aika nung anentsüh aser tzümetsüng ataloker, aser tzünglu maruba mapang alutem nung tzü akongba aser kitsükkirong lendongtem ataloker, ta paisa ashi.
Tesüiba küm ishika tsüngda asen state nung mongpu melenshiyonga arur aser iba ajanga lendong balala ajurur. Ajisüaka, iba dak sendakba mongin nisungtemi lendongtsüdong nungi jenbutsü aser mapa inyaktsü indang —-
Lendongtsüdong atalokdang yariteptsü atema Village Guards nem tesayubatem agütsüogo aser Armed Forces o Police nung company kar nema training agütsüogo. Maneni tawa tu, district ajak nung State Disaster Response Force (SDRF) tentetogo, ta Nagaland chief secretary-isa metetdaktsü.
Sentong nung Consultant (ME & IRS) NDMA, Brigadier Kuldip Singh-i o jembidang, alima nung lendong kanga atalokba tesemtem rongnung India densema lir, ta ashi.
Alima lendong tulu atalokba linüktem tarensen nung China, US aser Philippines sülen India jenjang pezübuba nung lir, ta Brigadier Kuldip-i shisem.
Tarutsü nung infrastructure constructions ajak lendong balala nungi kümzüktsüsa yanglutsüla aser Nagaland nung lendongtsüdong atema capacity building maparen inyakba atema kanga pelar, ta paisa metetdaktsü.
Anogo ananü training tenzükba sentong nung mendenji Commissioner & Secretary (NSDMA) Khrienuo Metha liasü aser Additional Chief Secretary (Home) Temjen Toy-i tesentepertem pela agizük.