Menur aruba atema kilonseri menden toktsütsü mepishi

London, Feb 01 (Agencies) : British nunger House of Lords nung züngsaem kati pa menurang chamber tonga aruba atema tadok meshia pa menden toktsütsü mepishi.
CNN osang ajanga ashiba agi, International Development Minister, Lord Bate shiba taoba nunga Conservative telok nungi MP liasü, pa asüngdangyaba (oral questions) tenzüktsü atema 15:00 ako (GMT) nungbo House of Lords chamber tonga arur alitsüba liasü.
Pai ashiba agi, “Mapang shidak nung tonga marutetba atema ni kanga akseter anungji tang nungi ni kü menden toktsütsü atema Prime Minister dang asüngdangtsü. Ni aibelenba nangzüker.”
“Kanga dang tongtibang onük ka nung Baroness Lister-i asüngdangbatem ni langzütsüba liasü saka la akhüm metsübur ta asütsüsa ni telangzüba magütsütet nungji aibelenba atema ni tadok meshir,” ta pa amenba tesem tonga aruli Lord Bates-i ashi.
Külem züngsemtemi pa dang tuo ta mepishiaka pai manga aser parnoki mepishia dang yutsür pai pa chamber toktsür ayamesoa ao.
“Yamala tila teri nung aibelenba atemajibo peisasa aibelenogo ta tadok meshira iba jagi teperi,” ta House of Lords nung opposition lenir, Baroness Smith of Basildon-ia metetdaktsü.
Aji oda süaka, yamaji inyaktsü menüngdak ta shia Bates-i pa menden toktsütsü mepishibaji British prime minister Theresa May-i magizük.
“Menüngdak asünung, pai kilonser menden toktsütsü mepishibaji magizük. Bendanga agütsür mapa meranga inyakba kilonser ka asünung, pai yamaji mepishibaji tim dang kechiaser pai Parliament mapaji kanga dang nendaka inyaker,” ta Prime Minister Theresa May den inyakba otongdari metetdaktsü.