Menüremang aser Meimang

–  Mrs Meyisongla, Rtd. Deputy Director Nursing.

Menüremba agi kecha takoksa malur, saka iba yagi tepela taliang bendenloker. Tagizük- sangji temoatsü tulu angur. Tagütsüsangi koma menürem yamaji dang agizüker. Ibai tsüngperet peretloktsür ama, mapang tera ka meindoki second nung agizüker aser tepelajibo taküm tepiyong alir. Menüremloktsüba agi sensaker makümer aser tagizüksangjia takar makümer, saka tena tsüngda tesendaktep tulu akar. Kidang, office nung aser shishilempa dak menürem ya kanga nüngdaker. Shisabulua alir süneptsür, tamang aser teimla samartem atema tasü itdaktsür, tejashir molungjang sangwatsür, timtemer atema anisungzük tulu agutsür. Na anogo tepiyong nung shingaia menürema mereprangra nai menüremlokjang.
Mapang ka nung Hospital tulu ka nung doctor ka dang, shirangerbo aika lir. Shisa taka tambur kati doctorba dang yamai asüngdang, ‘Doctor shiranger paikai lir. Doctorbo nü mesüng, hospital nung mozü peria maka. Kodasür nai parnok aneptsutettsü ?’ Doctorbai ken bilemdanger yamai ashi, ‘Ni parnok ken menürema reprangtsü.’ Shirangertem noklang nung 50% doctor-i ken menürema reprangba agi shirangji aneper. Menürem dang mapang magir. Menüremji temeim molungjang nungi adoker. Iba dangji taneptsü menürem ta ajar. Kolkata nung kanga dang sensaker aser teyari malir teimtemer aika anidena Mother Teressa-i mesüa liasü. Lai parnok taochi menürem agi temulungjang peladaktsür aser taneptsü agütsür. Ken mapang ka nung , kibong ka nong tebur chanu ka dang liasü. Paji ajungpena süadok. Iba sülen mapang kobi melii kinungbojia süadok. La joko teimla ajak sama adok. La den yariteper ka ta mali, la kanga shisabulu. Amui maoer, mechiyongteter, aser lai Tsüngrem dena atakatema nemnema, tekolok dena meshidaki kümer, ku sarar, mojing ama tetsubutsüka aküm. Idangji temeim aketba Nurse kati ola tanük agi ‘Tsüngremi na yaritsu, kecha shisa tebulu’ ta la teka nung ameter ken atendang laji amuozüka ao. Temeim agi kodang tejashir molungjang nung kongshidir, tejashiba ajakji tepela agi melener aser anisüngzük angur. Iba dangji temeim menürem ta ajar.
“A word of comfort can quiet a troubled spirit.”
Anemsü menürem agi tangar molungjang yirutsür. Shisabulu aser tebilemtsü kadaktsür. Nai anemsü menürem dang menüra memenui ali tajungba. Ken mapang ka nung tila tanur Dawid küm 15 asüdang tedi den ajuruteptsü ao. Idangji nisung temang tulu, tar talang ka kanga dang ngasangatema aser kolukotema menüa senzüba Dawid-i angu. Pai nisung dak taochi makai azüker aser rakzükraktema senzüba angu. Pai teti dang, ‘Nisung ya kechiba yamai asüküma doktsür ?’ ta asüngdang. Idangji tedi nungertemi pa dang yamai langzü, ‘Pa aso tulu, tashi tait, mojing amai dang lir. Shingaia pa dang kecha meshiteter.’ Idangji tila tanur Dawid-i ashi, ‘Pa yamaji talang aser tulu masu. Ni pa den raratsü!’ ta ashi. Idangji teti kanga aoksa aser ashi, ‘Nai kodasür yamala nisung den raratsü? Tamakoktsu.’ Saka Dawid-i, ‘Ni pa odang medoktsutsü!’ ta ashi. Dawid-i raraba subotsü kecha mesübo. Saka pa yangko nung lishi agi menokba longsang den rubber lijak dang ka bener ao. Aji ngua Goliath kanga jashi. ‘Kechiba ni yamai mezüng meshir! Iba ama tila tanur ka jagi kü den raratsüba na ?’ ta kolukotena menü dang, Dawidi pa lijak jang jagi Goliath tenütsü nung kaloktsü aser pa yangji atanga lao.
Asenoki iba lesson nUngi menu tapu pongu angur :
I. Taneptsü menürem
II. Taochi menürem
III. Temeim menürem
IV. Anemsü menürem
V. Kolukotem menürem.
Naiah koba shimer?
MENÜREMANG ALIMAI NA MENUREMA REPRANGTSÜ.
Ø Menürem agi tepela a bener arur.
Ø Menüremtsü tasak masu aser mapang magir.
Ø Menüremi teti atema tesendaktep tajong bener arur aser takok angur.
Ø Menürem-I shishilempar nem takok agutsür.
Ø Menürem nong takoksa kecha mali.
Ø Menüremji tasü maiter nem anü tesangwa agutsüba den kasa.
Ø Menüremi jashia aliba mesüra timtema alir molung peladaktsür.
Ø Menürem nisung ajaki aginür.
Ø Menürem jaakten yagi 50% aneper.
Ø Taochi menürem agi tesamaba tanüla jenti kümzüker.
Ø Temeim menürem yagi teraksa molungjang nung tepela agütsür.
Ø Tenük merem aser anemsü menüremi teraksa aser lendong bener arur.
Ø Tepela molungjangji mozü tajung.
Ø Tepela molungjang nung tashidak mamonger.
Ø Ap shin. 22 : 17
Ø Merangdangang/Just try.
Ø Na kodang jashia jepnüdir nai, ken ka atentsü merangang.
Ø Naro mesüra süngdong tajung ka den jembia menütsü merangang.
Ø Mesüra na anasa asapranga aliba ozü den jembia menütsü merangang.
Ø Ango tzü nung tsüngsangba ama menüa tsungsangtsü merangang.
Ø Alima yimya mopung repranger ola tashi agi adoka menütsü merangang.
Ø Naro aser süngpenlipen nong teronem tanang menemba ama takumjia yamaji tanang asünongbo ta süngmanga menüang.
Ø Anü adokba ngua pelapa ama, mesüra anü ayidang temolung ajempanga aküm ama.
Ø Mapang talangka tsüngsarosa lir tsünglu tulu aruba ngua pelapa aser menüremba ama.
Ø Nennena aliba moapu (green garden) repranga pelabaji koda jangratemtsü. Aji mesüra nü azü jajapaji reprangdangang, na tasü asütsü.