Mepet tzüsü ajanga Delhi nung train 71 mejajai ata

New Delhi, January 12 (Agencies): Mepet tzüsü kanga sashia aluba ajanga India anüdoklentip tsütsü Mongulbarnü train 71 tashi ati, ta Northern Railway sangdong ka ajanga metetdaktsüogo aser train 10 tashi atakteta yutsüba mapang dang nungi temonuba apuso.

Aji oda süaka tayimtsübo aghi ama senzüdar, ta Delhi airport ketdangsertemi ashi. Tang menur jajaya-a aliba train tem rongnung Howrah Express aser Rajdhani Express nata dena lir, ta railway sangdong ka ajanga metetdaktsü.

“Anüngbo anogo piyong kanga merüka alitsü,” ta India Meteorological Department-i metetdaktsüogo.

Mongulbarnü Delhi nung mopung temokongtibaji 8.5 degrees Celsius liasü aser tatsüktibaji 25 degrees liasü. Kasa anogo nung anepdang 8.30 ako nung tzüsü noklang nung shilem 95 liasü aser tenük agi talangtiba angubaji metre 100 tashi liasü, ta Meteorological Department nung ketdangsertemi ashi.

Hombarnü Delhi nung tatsüktibaji 25.5 degrees liasü.

“Ano Deobarnüa tzüsü temelem aluba ajanga tenük agi tatsükata atetpoka mongui liasü aser ibaji ajanga train jajaba mapang raksaa Rajdhani Express-a gondha 10 menor apuso.