Mera kabo tali aotsüla !

Naga yimten tebilemtsü tatembang küma akoktsü asoshi tang India government o NSCN-IM na ken o tejembidak lir aser tanga teloktem odang atadagi. Iba ama mapang ka nung state government-i tatar senden nung ajaki mulunga agizüktettsüsa telemtetba bener arura menden azüngtettsütsü mulunga lir ta lemtetpet lemtettsüba ya nüngdak madoker. Jungjunga bilemdangra, ajaki mulunga agizüktettsüsa telemtetba kati arutetra, iba atemajibo mena aliba menden azüngtettsütsü atema telemtetba agia alitsübaji menüngdaker.Nagaland nung aliba Naga nunger tatar yimsüsürtem shisatsü agibo iba telemtetba dang nungi talila mera kata moutetter na (?) ta shisabolua bilemer. Aji oda, ajaki agizüktettsüsa telemtetba bener arunungbo tanurtemia dena pelashishia agizüktsü. Ajisüaka, tanübo ajaki agizüktettsüsa telemtetba ka bener arutsü asoshi atali, election ka agili, ano küm pongo süidaktsüli, ano kasa ataa alitsü telemtetba ka agili ta asütsüba mapang masü. Election ka agili India government dang sen meshia bener arua government pezü pongo lema agili ta asüba agi shinga majangzüktsü. Sen agirtemang timtatemba aser magirtemang timtatemba ta Naga nunger telongiang taluba taluba alur. Iba tashidak agi tang asenok ajak kangshidagi. Aji oda, tangbo Nagaland government atema ajaki agizüktettsüsa telemtetba tajung bener arura ta atatsüba mapang masü saka yamai latet nunga koda (?) mesüra yamai latetdi nie (?) ta tebilemba ken o benoka jembitsüba mapang lir ta bilemer. Atangji, Nagaland state government-i Naga yimten tebilemtsü koktettsüsa lenmang bushitsü atema ‘Committee’ kabo shima lir südi. Aji oda, iba committee jagi kechi inyaker aser tatar sendeni kechi koma osang bener arur ta asübajiang tongtibangba asütsü. Iba amaji ka mesüra ajaki agizüktettsüsa telemtetba ka aru atatsü atemabo committee shimtsü menüngdaker. Tanü Naga nunger ajaki Naga yimten tebilemtsü tatembang küma jembitettsü asoshi Naga nunger telok ajak külem ser lenmang bushitsüla ta jembiba angashir. Iba kasaji India government-ia jembir. Iba jagi asenok nem jembitsü shisatsü tilakabo sayur aser jembia aotsüba lenmang tilakabo lapoktsür amai bilemer. Aji oda, tanü Nagaland tatar senden nung amener tatar yimsüsürtemi anir Naga yimten tebilemtsü koktettsüsa inyaktsüba rongdak nüngdak kaji, Naga nunger anüdoklen alir o anülulen alirtem na ajurutepa amentsüla. Iba kasaji Naga nunger anüdoklentip alirtem o anüolentip nung alirtem na ajurutepa amentsüla. Kodang item Naga nungertemji ajurua ken o jembi tenzükdir, iba jagi Naga yimten tebilemtsü akoktsü asoshi lenmang bushi tetenzüker asütsü. Iba nung jagi tenzüker Naga nunger anüdok aser anülu, anüdoklentip aser anülulentip alirtem ajak külemi ajurutepa takoktsü lenmang bushitep tenzüktsü. Iba ama senden ayongzüka shisalemsatepba nungiang tebilemtsü akoktsüba lenmang ngutettsü. Iba ama senden amentsübaji Nagaland tatar senden nung amenertem rongnungi kar shimteta inyakdaktsütsü akok. Aji oda, kodang Naga nunger kinük pezüsülen alirtem ajurutepa takoktsü aser tamakoktsü ken o ajak benoka jembir telatetba ka agitetdir, ibajia ajaki mulungabo magizüktsüa akok, saka iba ama telatetbajibo mapa küma benshia otettsü, kechiyong ibaji Naga nunger tanü aser asüng asoshi bilema Naga nunger yimten aser lokti nung lenirtemi latetba asütsü. Joko, alima telongi alur, nübortem tejakleni moutetter aser lanurtem taküm teraksamar ta asüba tia nungi Nagaland kümzüktsü tensa tiai akanger asünung, yimsüsürtemi aser nübortemia repranga dangbo malitsüla saka telemtetba agitsü merangba nung shilem agitsüla. Yimten nüchiso jenjang nung masütsüa akok mesüra Naga nunger lushi ajak yimten ka kübok melongjemtettsüa akok, saka tanü tensa dak apet Naga nunger ajak tenüng nung Nagaland tatar senden nung amenertemi anir lokti tentettem ajak dendakja telemtetba ka agitetra, Naga nunger tang aser tarutsü asoshi tagitsüjibo aji dang asütsü.