Meranga aluyimba nung tarutsü teimla lir: Mhathung Yanthan

Dimapur, Rongchii (April) 06 (TYO): Department of Horticulture Advisor, Mhathung Yanthan-i, meranga aluyimba nung tarutsü teimla lir; hi technology amshia ali tasazük tilaba nung aonsotsü jenti züsentettsüji kanga tongtibang, ta metetdaktsü.
Department Advisor akümba sülen tanü mezüng State Horticulture Nursery (SHN) Dimapur semdangba mapang nung pai iba o ya jembia liasü.
SHN aser DHO Dimapur staff tem den jembidang Yanthan-i parnok dang pei tajungtiba agi inyaktsü aser nüburtem tajungtiba agi tenzüktsüla, ibaji ajanga mapa nungi anisüngzükba sülen mesasatsü, ta ayongzüka liasü.
Paisa, Dimapur ama tesem tajung ka nung ali hectare 32 alibaji department atema kanga tia taka, ta ashiba den külemi department nükjidong atalokdakja research centre tiyongtsü ka aser shisatsü poktetdak tiyongtsü ka kümdaktsütsü ayongzük.
Sobaliba aonsotsütem aika samatsüsa jenjang ka nung lir, ta shia Yanthan-i parnok dang item ama aonsotsü aser süngjanglijangtem wazüka ayuba den külemi ajungkettsütsü ayongzük.
Yimtsüngtem nung aluyimertemi züngsentetbatem ayoktsü atema market junga maliba dak sendakba nung pai Horticulture ketdangsertem dang ibaji junga shisadanga bushisüngdangtsü ayongzük.
“Metsühjang aser senotsü teyari agutsüba kijaji teperi masü, saka aluyimertem maneni ajungshia inyaktsüla,” ta paisa metetdaktsü.
Dimapur ya tsüngsangmopung ajungba dang masü saka market atemaa tajung, anungji aonsotsü züsentetba aser itemji shishilembaba nung Dimapur district ya temaba südaktsütsüla, ta pai ashi.
Advisor-isa department nung ketdangsertem dang Central laboratory SHN ulushitsü atema benoktsüla, kechiyong tang aliba lab ya kanga tila, ta ashi.
Paisa state nung temelenshi adoktsü atema ketdangsertem aser staff tem longjemer inyaktsü ajungshi.
“Alima melenshiba den liromedema jajatsü atema asenoki tasen purapiteta inyakdi aser tangatetba tasen nung tasa tasen amshia inyakdi,” ta pai metetdaktsü.
Director Horticulture, Dr.Elithung, Jt. Director, SHN Dimapur, Imrong, AHO, SHN Alemtemsu, DHO Dimapur, Temsu Longkumer aser Horticulture officer SHN, Theja nungeria Advisor dang Horticulture dak sendakba nung parnoki inyakba aser metokmeperitem metetdakja liasü.
Mhathung Yanthan-i State Horticulture Nursery nung Hi Tech vegetable Seedling Production Unit, Hi Tech controlled green house, Plant gardening facilities, Warehouse, Central Lab, Mushroom development centre aser Green Park semdanga liasü.
Pa den Director Horticulture aser department nung ketdangsertem densema liasü.