Merangkong Senso Telongjem Kohima (MSTK)-i Moatsü amung

May 3, 2016 nü Kohima nung MSTK-i ayongzükba Moatsü benjungmung nung Parliamentary Secretary tem – Amenba Yaden, Er Levi Rengma, Yollow Konyak aser tangartem külemi agiba noksa angur.

Kohima, April 3 (TYO) : Merangkong Senso Telongjem Kohima (MSTK)-i Highland Park, Kohima nung Moatsü benjung ayongzüka amung.
Benjungmung nung tongti tesemdangerji, Industries & Commerce Parliamentary Secretary, T. Amenba Yaden liasü aser pai o jembidang Moatsü teratet tatsü agi metetdaktsü.
Amenba-isa MSTK ajanga adokba ‘Merangkong Moatsü Mong’ indang kaket ka sayatsü.
“Lanuputui iba benjung dak sendakba sobaliba aser yimyatsüyatem memetet, kechiyong parnoki mezüng anogo nungi tenzüker troknübuba tashi maparen inyakba mongudang. Tebang agi jembia aruba otsütem aiben mapa küma mamshir, ajisüaka iba kaket ajanga tazüngertem kanga ajangzüktsü imlar” ta Wb. Amenba-i kaket sayatsüdang ashi.
Sentong nung MSTK Tir, Dr Moanungsang-i o jembidang asen tetsüteboutemi Lichaba tsüngrem külem aser Moatsü benjung nung parnoki alu nung metsü prokba atema temoatsü meshia amung.
“Khristan yimsü asuba sülen, limapurtem mapang amungba benjungbentsü ajunga temenen ama züngshi aser iba jagi lanupututemi asen sobaliba aser yimyatsüya aika memetet. Asen sobaliba aser yimyatsüyatem ajanga asenok maitsü jangjar, aser item ajakji temenenbo masü. Asenoki asen Kümtetdakba Yisu Khrista dang nungi temaitsü meshia Moatsü benjung mungdi. Asenoki tsüngsangba aser kentenba ajak jagi chichiba Tsüngrem külemdi” ta Dr Moanungsang-i ayongzük.
Sentong nung tsürapur S Yaren-i temoatsü meshia sarasadem aser Dimapur, Tuli o Kohima nungi teloktemi tajungshi o tem jembi.
Tanü amungba sentong nung Housing Parliamentary Secretary, Er Levi Rengma aser CAWD Parliamentary Secretary, YM Yollow Konyak na den tongti ketdangsertem aika aden.