Meriema VYO aser United Brothers R-16-i iogo

Meriema VYO aser United Brothers R-16-i iogo

19th NSF Martyrs’ Memorial Trophy
Kohima, Mongputeni/Oct 6 (TYO): Meriema Village Youth Organisation aser United Brothers FC-i tanü pei tata asaya koka 19buba NSF Martyrs Memorial Trophy round of 16 tongtetogo. Iba asayamung ya Angami Students Union-i ayongzüka Kohima Local Ground nung tang tasayadak lir.
Tanü asaya mezüngbuba nung Meriema VYO-i goal 3-0 agi Legends Hostel FC madak takok angu. Asaya nung MVYO pur atema goal asemprongla ya asaya tanabuba shilem nung idaktsü. Parnok rongnungi Keneisezo Keditsu-i minute 48buba nung mezüngbuba goal idaktsü aser iba sülen Vizotuolie Lhousi-i goal tanabuba aser tasembuba minute 55 aser 83buba nung idakja parnoki asaya akok.
Asaya nung asayar yimya shidak mebenshiba atema Meriema VYO nungi asayar Khrieneituo Kezie-o aser Khriengülie Üsou aser Legends Hostel FC nungi asayar Sakuolie aser Penai nunger nem yellow card kaka agüja liasü.
Iba sülen asaya tanabuba nung Tangkhul Katamnao Saklong (TKS) Manipur aser United Brothers, Dec Block Kohima na asayatsü liasü saka TKS pur marutetba ajanga iba asaya athi.
TKS pur koda masüba timtem kar ajanga asaya nung shilem magitettsüsa aküm ta asayamung ayongertemi metetdakja liasü.
NSF MMT Bylaw kübok sections kar nung aliba ama United Brothers FC nem walkover ajanga TKS madak takok agütsü, ta asayamung ayongertemi metetdaktsü.
United Brothers FC aser Meriema Village Youth Organisation na Mongputeni/October 11 nü 2:00 ako nungi tenzüka taruba round nung asayatsü.
Mongputeni/Oct 8 nü asaya yamai alitsü:
1. Kigwema S.U vs Viphoma M17 F.C @ 12noon
2. Seiyhazou Hill Boys F.C vs Saptiqa F.C Zunheboto @ 2pm

You must be logged in to post a comment Login