Merkel-i Davutoglu den ajuruteper

Ankara, February 08 (Agencies): German Chancellor, Angela Merkel-i Turkey Ato Kilonser, Ahmet Davutoglu den tanü, Hombar nü ajurutepa senden ka amenba osang jangjaogo.
Tanü senden nung pei linük toktsüba migrant nisungtemi Europe nung jenoka alitsü merangba maparen ajemtsütsü tasa aser lenmangtem bushitsü onük benoka jembia liasü.
Merkel-i tenzükba migrant nisungtem ajemtsütsü mapatong nung Turkey ya kanga dang tongtipang linük ka lir kechiyong Europe nung jenoka alitsü meranger migrant nisungtemi Europe nung jenoktsü tenzükba linük tongti rong nung Turkey linüka densema lir.
Yaküm, 2015 küm kisüng nung Syria, Iraq aser Afghanistan nung tongpang raraba ajanga pei linük melitettsüsa akümer migrant nisung million 1.1 shi Germany nung jenokba osang bushitetogo.
Turkey linüki par arrtsü lapoka Syria nunger migrant nisung 35,000 shiji par linüki anioktsü asoshi EU-i Turkey ajungshiba mapang ka nung Merkel-i tan Turkey semdanger lir.
Ajisüaka, par linük sünga migrant nisungtem anioka lir ta tang Syria nunger refugee nisung million 2.5 shi anioka aliba Turkey linüki metetdaktsüogo.