Merkel-i refugee nisungtem yaritsü mapatong tenzüker

Berlin, August 13 (Agencies): Germany Chancellor, Angela Merkel-i par linük nung jenoka alir refugee nisungtem yaritsü mapatong ka tenzükogo.
Lar linük jenoka alir refugee nisungtem yaritsü nükjidong nung Germany nung tentetba tongti shishilembatsü telok lenirtem den arok senden ka taruba September ita amentsü renemba osang Merkel-i tanü, Honibar nü metetdaktsü.
Iba senden nung tongti shishilembatsü teloktemi refugee nisungtem nem mapa agütsütsü ajungshitsü alizüng Merkel-i yua lir.
Yaküm, 2015 küm kisüng nung pei linük toktsüba refugee nisung million 1 dak temai Germany nung jenokba osang bushiteta lir aser par linük jenoka alir refugee nisungtem nem mapa inyaktsü lenmang lapokja parnok taküm alitsü asoshi sorkar dak metalokbaren ajemtsütsü asoshi Germany sorkari alizüng ayuba osanga jangjaogo.
Ajisüaka, “Germany nung jenoka alir refugee nisung timbakati German oshi mejembitetba den külemi, parnok dak tazüng temetet mali,” ta shia, Germany nung tentetba shishilembatsü teloktemi refugee nisungtem nem mapa agütsütsü asoshi nungnanga bilemba olen metetdakja lir.
Tan refugee nisungtem yaritsü asoshi tenzükba mapatong nung engeering telok, Siemens; chemicals telok, Evonik aser Opel o VW na densema, tongti gari yanglur teloktemi Merkel den yariteptsü renema lir.
Germany nung tentetba shishilembatsü teloktemi refugee nisungtem taküm jenjang tajungba kümdaktsütsü asoshi tali bendanga agüja inyaktsü tajungshiba olen ka Germany Vice Chancellor, Sigmar Gabriel-ia taoba July ita sangokja liasü.