Merkel-i refugee tem dang ozüng akhümtsübutsü ashi

Berlin, April 1 (Agencies) : Honibarnü Germany Chancellor Angela Merkel-i linük nung aliba refugee tem dang pei aliba tesem nung yanglua aliba ozüngtem akhümtsübutsü ashidang, Germany nungeria ajak den sadoka alitsü ajungshi.
Küm ana tsüngda nung Germany nung tejenokdak bushir parnok nisung million 1.2 aitdakja lir aser September ita nung election agitsü aliba linük nung nüburtemi immigration inyakyim kanga kishir aser metetner, ta osangbenertemi ashi.
“Refugee temi ozüngi ashiba anga linük inyakyim nung temulung agüja onok akhümket yimya akhümtsübutsü ni imlar. Iba den külemi asenok Germany nungeria sadok sadoka alitsü merangtsüla,” ta Merkel-i ashi.
Merkel-i immigration sector nung inyakertem den majurutep tsüngda Cologne nung aliba tejenokdak tesem ka semdangtsü sentong lir.
Lai, alima tesem balala nungi refugee tem aniokba ajanga Germany nem sobaliba aser yim balala angazüktsü maongka agütsür, ta ashi.
“Asenoki iba ya asen linük asoshi maongka ka amai agitsüla,” ta lai ashi.
Germany-i arur refugee tem aikati ki tazüng maliba yimtitem nung tejenokdak bushir.
Merkel-i tawa-a refugee tem dang yimtsüngtem nung jenoktsü shiogo.