Merkel o Hollande nati EU Parliament nung onük jembitsü

Brussels, September 21 (Agencies): Germany Chancellor, Angela Merkel aser France Tir, Francois Hollande nati taruba October ita amentsü ayongba European Parliament senden nung külemi onük jembitsü renemogo.
Strasbourg yimti nung taruba October ita 7 nü amentsü ayongba senden nung külemi onük jembibaji taoba mapang, 1989 küm jembiba sülenbo linük ana nungi leniri tan mezüngsüa külemi onük jembir alitsü.
“Tan onük jembitsü renemba ya otsüsütsüka lir. European Union (EU)-i tang timtem khuret jenti ajurutsü tenzüka lir aser iba ama tensa tamajung ajuruba mapang nung ozü lenirtemi tali bendanga agüja temulungtetba tajung ayuba atema kanga dang pelar,” ta EU Parliament mendenbuba, Martin Schulz-i tanü metetdaktsü.
EU nung züngsemba linüktem rong nung rongsenren jenjang temaba nung alir Germany o France linük na lenir, Merkel o Hollande nati refugee khuret nungi tenzüker Ukraine den sentakba khuret ajunga bentettsütsü asoshi tongti shilem agiba osang bushiteta lir.