Merükmeju temaba jenjang nung Sikkim lir

New Delhi, September 09 (Agencies): National Sample Survey Office (NSSO)-i merükmejuba nung survey ka agia merükmejunba temaba jenjang nung Sikkim aser Left Front sorkar aliba Kerala state na lir, aser tsünglangtiba jenjang nung BJP-i yimsüsüba states- Chhattisgarh aser Jharkhand na lir.
Drinking Water & Sanitation sangdong ka ajanga ashiba agi, district rongnunga tsünglanglen aliba jenjang nung Dungarpur (Rajasthan) aser Panchmahal (Gujarat) na densema lir aser temaba jenjang nung Sindhudurg (Maharashtra) lir.
“Tanabuba jenjang nung West Bengal nung aliba Nadia district aser iba sülen Satara (Maharashtra) aser Midnapur East (West Bengal) na lir,” ta sangdong nungsa shia lir.
Nisungtemi kibong/lokti metsümeshidak amshiba temaba jenjang nung Sikkim lir, parnok nisung shilem 100-i metsümeshidak amshir aser sanitary toilet shilem 98.2 lir.
Sikkim sülen tanabuba, tasembuba aser pezübuba jenjang nung Kerala, Mizoram aser Himachal Pradesh state tem lir.
“2015 küm May-June ita nung NSSO-i merükmejuba survey ka agia liasü, iba mapang nung parnoki India nung yim 3,788 nungi kibong 73,176 sema liasü,” ta Swachh Survekshan – Gramin 2016 report nung shia lir.
Sikkim aser Kerala na dak alia merükmeju aliba state tem rongnung Mizoram, Himachal Pradesh, Nagaland aser Haryana state tem densema lir.
Kasa survey jenjang 12buba nung West Bengal aser jenjang 17buba nung Jammu and Kashmir lir.
“Iba report ya ajanga peipei district temi koma inyaker ibaji angatetba dang masü saka iba ya ajanga parnok tsüngda tetoktepba shisatsü tajung alitsü. Iba ya ajanga merükmejuba jenjang tajungba akümtsü,”ta Ministry nungi otongdar kati ashi.