Merüktetang, anasai arung

Tsüngrem anasai arung aser Pai nenok anasai arutsü. Nenok temenenpurtem nenok teka merükang; nenok temulung ana atenba purtem nenok temulung meshitettang. Yakob 4:8

Tekong 7-10 nung shirnoki kümzükba taochi agizüka lir parnok nem ozüng ter agüja lir: Tsüngrem kübok liang, nokdangang, anasai arung, merüktetang, meshitettang, etc. Itemji telunglen mapatem lir. Tsüngremi Pai shimtetba purtem nem Pa taochi agütsüba sayutsü atema itemji inyaktsüla. Khristan kati Tsüngrem metetba dangi arutsü aser tali ainba item jaklatemji akatsüla. “Tsüngrem anasai arung!” Kari ashir ibai mekümzüki alir kümzüktsü asoshi arutsü ashiba ta bilemer. Parnoki Pa anasai ora, Tsüngremi kümzüktsü ta bilemer. Saka Tsüngremji ochi aser temeshi lir aser Pai temenen sempar. Pai temenenpurtem den telungjem akatsü makok (aji asenok ajak). Temenenpuri pei temenen meküpdang tashi (aji tamakoktsü) mesüra temenenji azü agi menempang tashi, “Azü metokshi, temenen tatokba mali.” Mezüngbuba Tsüngremi asenok shimtet (Yohan 15:16). Asenoki Khristaji asen Kümtetdakba aser Kibur ta agizük, Pai jenjangji agütsü, idangji dang asenoki Pa anasai arutsü akok.
Tsüngremji ochi aser temeshi asü nung, asenoki Pa anasai mao dang tama asenok teka merüktettsüla aser asen temenen nangzüktsüla. Teka temerük Tsüngrem anasai aoba jagi tema taküm aliba yimya sayur. Temulungjang meshitetba jagi asenok temulung nung bilemba, tejangraba aser jakla sayur. Khristan taküm kaji yimya ozüng ka lir, maneni Tsüngrem kübok aliba, anasai aoba, merüktetba, etc. Aseni asen temeim tebu den longjemtsü bushidang item ajak ya inyaktsüla.
Oba, ni temenen nungi merüktettsüba aser ni anasai aruba asoshi Ne tenüng asanger. Amen.