Meshiang aser nai angutsü

Nenoki meshir, saka mangur, kechiaser nenok pei azüabung nung endoktsü asoshi nenoki aibelena meshir. Yakob 4:3

Yakobi iba shidi tamangertem dangi zülu – kin ter ana prokshia alir dangi zülu (1:1). Apijemtsü Shin kaket nung ama pai shisa kaa alitsü indang zülu, aser pai temeshi liba-liro aser Tsüngrem O nung tashi angaba dak ranglok. Angashitsü karaang, jembitsü meilungi süang, ain adoktsü milungi süang, tsürabur malir aser amitsür semdangang, temeli azüokang; aser ne tamang akangakanga liang.

Idangji pai kechiba parnok nüngdak asüngdangtsüla aser koda asüngdangtsü iba indang jembi. Nübur rongnung Tsüngrem nungi item kuli asem rong nung ka mesüra kati anünga lir: 1) Parnok makar kechiaser parnoki masüngdanger, 2) Parnoki tai meshir, aser 3) Parnoki Tsüngremi mulungba ama masüngdanger.

Laishiba ajunga nung asenoki Tsüngrem dang koda meshitsü aji shia lir. Aiben Yisui meshiang aser nenoki angutsü ta ashi (Mathi 7:7; Luke 11:9). Asenoki kechisa meshir aji asenok nem agütsütsü ta Yisui ashi (Yohan 15:7). Yohani ashi, asenoki kechisa meshidir Pai agütsütsü ta asenoki amangtsüla (1 Yohan 5:15). Tejen Lai nung Dawid ashi, Tsüngremi asen mulungjangi jangraba ajak agütsütsü (T.Ken 37:4). Süra kechiba asenoki asüngdangba asenoki mangur? Idakji tama metettsüba ka lir. Asenoki tebilemba shitak agi meshitsüla; asenok Pa dak alitsüla; asenoki Pai mulungba asüngdangtsüla aser Pa O azüngba aser sarasademba ajanga asenok Pa dak pelaa alitsüla. Sempet tajung ajak Tsüngrem nungi lir, asenoki koda Pa dang asüngdangtsüla aji dang asenoki metettsüla.

Tsüngrem, Nai mulungba ama onoki asüngdangra tasüngdangba ajak agütsütsü nangzük nung Ne tenüng asanger. Amen.