Messi aser Antonella na kibong kümogo

June 30, 2017 nü Rosario nung Lionel Messi aser Antonella Roccuzzo na kiyimba mapang tangokba noksa nung angur.  

Rosario, July 1 (Agencies): Lionel Messi aser Antonella Roccuzzo na Hokolbarnü Argentina nung par yimti Rosario nung kibong kümogo. Iba sentong nung football asayartem aser celebrity tem aikati shilem agia liasü. Tena tanur asüdang nungi medema liasü aser tena chir ana lir.
Tena nija sati küli agizükba sentong ka agiba sülen, hotel aser casino complex ka nung osangbener noklang aika sentepa alidak red carpet ka nung jajaa liasü. kibong akümba sentong nung Roccuzzo spain nunger designer Rosa Clara-i designe asüba mermaid-style gown ka asem.
Iba sentong nung par jabaso ana Thiago (4) aser Mateo (1) na den külemi tejaoker 260 shi aden. Sentong nung adenertem rongnung Shakira aser kinungbo Messi teammate Gerard Pique, Neymar aser Luis Suarez nunger aden.
Argentina media ajanga iba sati benjung dang ya Rosario atema “wedding of the century” ta ajar. Messi (30) aser kinungtsü Roccuzzo (29) na iba yimti nung pa küm 9 asüdang ajurutepa liasü.
Taoba mapang Barca nungi asayaa alisang aser tang Chelsea nung tasayadak Cesc Fabregas aser Argentina aser Manchester City striker Sergio Aguero nata iba sentong nung aden.
Tena kibong akümba benjung ya City Center casino nung agi.
Messi aser Roccuzzo na Barcelona nung alir saka dena mapangshia vacation atema Rosario aoer.
Messi arishi küm 13 asüdang FC Barcelona nung oa aden saka tena tesendaktep meraksai dang liasü. Messi-i tang tashi nung Ballon d’Or award ponguben tashi ngua lir aser pa ya alima nung football asayar tajungtiba ta züngshir.
Yimti nung aliba medemer tejentemi ashiba agi, tena ya kanga dang ajemaluba taküm kaka lir aser pei kechi nungi aru, aji kodanga mamadoker.
Kibong akümba senpet melena tenati children’s charity nung tenla agütsütsü asoshi mepishi.