Messi dang nungi Maradona teperiba:Pele

Kolkata, October 12 (Agencies): Kanga dang nüngtugu football asayar tejen, Pele tasoba anogo atongtsü ano anogo ishika lir, ajisüaka Academy Award angusang, kentener A R Rahaman-i Hombar nü pa nem ‘Happy birthday’ ken tenloktsü aser iba mapang Sourav Ganguly-ia teka malokja pela agizüka pa tasoba anogo jilia mungtsü.
Pele-i, Brazil nungi asayartem timba ka par linük nung masü saka Europe lima nung oa asayaba atema nemjema ashiba mapang, Argentina nung football asayar Lionel Messi dang nungi Diego Maradona teperiba (complete), ta ashi.
“Brazil dak alaka tesem aika nung mapang ka nung asayar tajung aika adoker saka ano mapang ka nungbo asayar madoker. Ajisüaka Brazil nung tebilemtsü tuluka lir, kechiba süra Brazil nungi asayar tajung ajak Europe len oa asayar. Asayar tajung ka adoktsü atema asayar telok ka nüngdaker. Shingaia kija masayatet, anungji telok nüngdaker saka telok ka akümtsüji kanga tasak,” ta pai ashi.
Taoba mapang India football team nung captain aser tang MP Prasun Banerjee-i Maradona aser Messi na naia koma bendanger, ta asüngdangdang, Pele-i, “Tenaprong asayar tajung. Ajisüaka football tsütsü kü tangatetba agibo, Messi danga Maradona teperiba,” ta langzü.
Pele dak alema alima nung FIFA World Cup nung asemben takok angur shinga mali aser pa tang Indian Super League (ISL) asayamung nung Atletico de Kolkata aser Kerala Blasters na asüng asayaba mapang tetushi tesemdanger asütsü.