Messi-i 2015 FIFA Ballon d’Or Award agizüktsü: Ronaldo

Barcelona, November 13 (Agencies): Argentina nunger Lionel Messi-i sangküm, 2016 küm January ita agütsütsü renemba 2015 FIFA Ballon d’Or sempet agizüka iba takokba 5 ben tashi agizüker asayar akümtsü ta Portugal nunger football asayar mongin, Cristiano Ronaldo-i metetdaktsüogo.
“2014-15 mapang ya ni tajungtiba asayatetba mapang ka lir,” ta tawa sangoktsüsang, arishi küm 30 tain Ronaldo-ia Ballon d’Or sempet agizüktsüsa Messi den sako jenjang ngua lir.
“Messi-i 2015 Ballon d’Or sempet agizüktsü akok kechiyong iba sempet ya vote timba angur asayari agizüktsü maongka angur,” ta Ronaldo-i metetdaktsü.
Messi-i kanga junga shilem agiba ajanga par Barcelona telok nem UEFA Champions League, La Liga aser Copa del Rey densema tongti takok marok 3 tashi agizüktsü jenjang tajung bener arutsüba den külemi, par Argentina telokia Copa America asayamong final nung shilem agitsüsa jenjang bener arutsüba osang bushiteta lir.
Ronaldo-ia Champions League asayamong nung goal timba agütsür akümba den külemi, par Real Madrid telok asoshi goal timba agütsür küma kanga junga shilem agiba osang jangjaogo.
Taoba küm 7 tejaklen nungi tenzüka, Messi aser Ronaldo nati alima ajunga nung football asayar tajungba nem agütsüba Ballon d’Or sempet ya melentepa agizüka lir.
Sangküm January ita 11 nü Switzerland kübok Zurich yimti nung sentong tajung agia agütsüba jakdang, Ballon d’Or sempet agütsütsü asoshi shimba asayar finalist 3 tenüng tan November ita 30 nü alima dang sangoktsütsü sentong renema lir.