Messi-i Afghan tebur chanu ka nem pa tola agütsü

Kabul, February 25 (Agencies): Argentina nunger foobtall asayar mongin, Lionel Messi-i pa maitsü ajenokba number 10 tola aser football ka Afghan nunger tebur chanu ka nem agütsütsüogo.
Afghan tebur chanusang, Murtaza Ahmadi-i pasasa plastic agi Messi-i teti asemba tola yanglur kasaji semer senzükba noksa tangoka internet nung maloktsüba sülen alima den külemi, Messi-ia iba noksaji ngua Ahmadi dangi pa tola aser football naji yok.
“Ni Messi kanga meimer aser ni asemba tolaia Messi-i ni kanga meimer ta sangdonger,” ta Messi-i yokba tola aser football pa ket atongba ajanga pa pungmang tulutiba asangsang nung ataloksang, Ahmadi-i kanga pela metetdaktsü.
Alimai ‘Messi meimsang’ ta ajasang, arishi küm 5 tain Ahmadi ya Afghanistan anüdoklen Ghazni province kübok Jaghori District nung alir ka lir.