Messi-i aniba Argentina telok Copa America final-i iogo

Houston, June 22 (Agencies): Argentina captain, Lionel Messi-i kanga junga asayaba ajanga par Argentina teloki goal 4-0 agi US telok madak semfinal asaya koka tang tasayadak Copa America Centenario asayamong final asayatsü jenjang yashi, Mongolbar nü ajangzükogo.
Yashi asaya tenzüker minute 32 buba nung Messi-i free-kick takok ngua metsüba sülen pa par Argentina telok asoshi gaol 55 buba agütsür küma, Argentina nunger football asayar ajunga rong nung goal timba agütsür asayar küma, otsü tasen yanglu.
Taoba mapang world player of the year sempet 5 ben tashi agizüksang, Messi-i international asaya 112 buba nung goal takok ngua agütsüba sülen külem sensopur, Gabriel Batistuta-i goal 54 agüja yangluba Argentina telok asoshi goal timba agütsür asayar akümba otsü ajangteter lir.
Par Argentina teloki küm 23 tsüngda nung tan agi mezüngbuba Copa America takok marok agizüktsü alizüng tan Copa America asayamong nung ajak agi goal 5 tashi agütsüsang, Messi-i yua lir.
Barcelona superstar, Messi-i pass tajung yanglutsüba ajanga külem asayar, Ezequiel Lavezzi-i asaya tenzüker minute 3 buba nung par Argentina telok asoshi 1 buba goal agüja liasü.
Messi-isa minute 50 buba nung pass tajung agüja külem asayar, Gonzalo Higuain nem par Argentina telok asoshi 3 buba goal agütsüdaktsüba sülen pai maneni pass tajung ka renemtsüba ajanga Higuain-isa 4 buba aser takokba goal asaya tembangtsü minute 4 shi anüng lia agütsüteta, par Argentina teloki takok angu.
Argentina teloki tanabuba semifinal asaya nung takok angur, Chile mesüra Colombia na rong nung ka den tan Deobar nü final asayatsü.