Messi-i Barcelona telok asoshi 500 buba goal agütsüogo

Madrid, November 07 (Agencies): Barcelona teloki goal 2-1 agi Sevilla telok madak takok ngua yashi, Deobar nü asayaba Champions League asayamong asaya nung Argentina nunger football asayar mongin, Lionel Messi-i goal 1 agüja, par Barcelona telok asoshi goal 500 buba agütsür aküm.
Tan takok anguba sülen Barcelona teloki points 2 tashi ajangzüka, temaba jenjang nung alir Real Madrid telok points 2 agi dang memenepi lir.
Yashi asaya tenzüker minute 15 buba nung Vitolo-i goal 1 agüja, par Sevilla telok temaba jenjang nung ajungkettsü.
Ajisüaka, asaya tanabuba shilem tenzüker minute 2 buba nung Messi-i Neymar-i renemtsüba pass ball agizüka, goal takok ngua agütsüba ajanga par telok anaprongla kasa jenjang aküm.
Tesülen, yashi asaya tenzüker ghonda 1 abensaba sülen Messi-isa pass ball tajung ka yangluja, külem asayar, Luis Suarez-i 2 buba aser takokba goal agüja, par Barcelona telok nem takok ngudaktsü.
Ano külen, Portugal nunger football asayar mongin, Cristiano Ronaldo-ia European Champions, Real Madrid telok nung 2021 küm tashi maneni züngsema asayatsü tezüngzüktep tanü, Hombar nü agiba osang angazükogo.