Messi-i Doctors Without Borders nem tenla agütsü

Buenos Aires, November 3 (Agencies): Argentina captain aser Barcelona nungi football asayar Lionel Messi-i tenla kanga agütsür aser tanga pai Doctors Without Borders nem tenla agütsütsü nangzükogo.
La Razon osangkaket anema ken o nung pai takok anguba sülen Messi nem €70,000 sen temenok agütsü.
2014 World Cup final nung Germany den tamakok anguba sülen journalist Alfonso Ussia-i Messi aitsüba ocet ka zülu. Iba nung pai Messi-i wig ka asem aser Nandrolone mozü achi ta shia liasü.
Iba ocet anema Barcelona okadak ken o benoka jembidang Messi metentsü aser iba oshidangji Spanish Supreme Court-ia mulunga agizük.
Okadaki La Razon osangkaket, yimozülur Francisco Marhuenda aser Ussia nunger dang Messi nem €72,783.20 temenok agütsütsü atema tetuyuba agütsü.
Iba ken o ya ita 18 shi jembia arur Brihostibarnü Supreme Court nung tatembangsa angadang aser iba sülen Messi-i pa nem agütsüba temenokji tenla agütsütsü ta metetdaktsü.
“Football asayar Lionel Andres Messi Cuccittini-i Doctors Without Borders nem €72,783.20 tenla agütsür” ta Messi indang management company-i metetdaktsü.