Messi-i Hat-Trick yanglu; Barcelona asaya 35 atonga akoker telok akümer

Barcelona, March 04 (Agencies): Argentina nunger football asayar mongin, Lionel Messi-i hat-trick yanglua kanga junga asayaba ajanga par FC Barcelona teloki goal 5-1 agi Rayo Vallecano telok madak takok ngua tang tasayadak La Liga asayamong nung yashi, Brehostibar nü shilem agiogo.
Tan takok anguba sülen Barcelona telok La Liga asayamong asaya 35 tashi atonga akoker telok küma otsü tasen yanglur lir.
Par teloki tan takok anguba sülen La Liga asayamong nung shilem agir asayar telok tarensen nung 2 buba jenjang abener, Atletico Madrid den points 8 aser 3 buba jenjang nung alir, Real Madrid telok den points 10 agi temaba jenjang ngua 1 buba jenjang maneni abentsü jenjang nguogo.
Yashi asaya nung Ivan Rakitic-i goal 1 agüja par Barcelona telok temaba jenjang nung ajungkettsüba sülen tanabuba minute nung Messi-ia goal 1 agüja par telok jenjang tajungba kümdaktsü.
Messi-i maneni asaya 2 buba shilem tetenzüklen tanabuba goal agüja par Barcelona telok goal 3-0 agi temaba jenjang nung ajungkettsüba sülen Manucho-ia goal 1 agüja par Rayo telok jenjang tajungba kümdaktsü.
Tesülen, Messi-i maneni par telok asoshi tasembuba goal agüja hat-trick yangluba sülen külem asayar, Jeremy Mathieu-i asaya tembangtsü minute 5 shi anünga alidang par telok asoshi pungobuba aser takokba goal agüja par Barcelona telok nem takok ngudaktsü.
Yashi asaya nung Manuel Iturra aser Diego Llorente nati red card temerenshi ngua asayadak nungi temaleni tuguadoktsüsa jenjang tamajung ajuruba yong par Rayo asayar 9-i asaya tembanga asaya liasü.