Messi-i par Argentina tenüng nung maneni asayatsü lemtetshir

Buenos Aires, August 13 (Agencies): Argentina nunger football asayar mongin, Lionel Messi-i par Argentina national team tenüng nung maneni toktepa asayatsü lemtetshiba olen ka yashi, Hokolbar nü metetdaktsüogo.
Taküm June ita 26 nü Chile den asayaba 2016 Copa America asayamong final asaya nung tamakok ajuruba sülen arishi küm 29 tain Messi-i international asaya nung joko shilem magitsü telemtetba ajungbena agia liasü.
Ajisüaka, par linük meimba yong Barcelona star, Messi-i par telemtetba melenshia, Argentina telok tenüng nung maneni toktepa asayatsü renemer lir.
“Copa America final nung tamakok ajuruba sülen ni international asaya nung joko shilem magitsü lemteta liasü. Ajisüaka, ni ozü linük meimba yong ni international asaya nung maneni toktepa shilem agitsü lemtetshiogo,” ta Messi-i osang jangjashitsü.
Pai international asaya teti asoshi toktsütsü lemtetba osang sangoktsüba sülen pa sapurtemi yimti balala nung yimdongsüa jajatsü sentongtem ayonga pai agiba temelentetba melenshitsü mepishia liasü.
Ano külen, Argentina national coach, Edgardo Bauza-ia Messi den Barcelona nung tan hopta ajurua Argentina national team nung tanaben züngsemtsü onük Messi den benokba osang jangjaogo.
Bauza-i taruba September ita 1 nü Uruguay den aser September ita 6 nü Venezuela telok den asayatsü lemzükba World Cup qualifier asaya nung shilem agitsü shimba Argentina telok asayar tenüng tarensen sangdongtsü renema liasü saka Messi-i tan telemtetba tasen agishiba yong asayar tenüng tarensenji melenshitsüsa akümtsü akok.