Messi-i Rio Olympics nung shilem magitsü

Buenos Aires, June 24 (Agencies): Argentina football coach, Gerardo Martino-i taküm August ita 5 nü nungi tenzüka Brazil kübok Rio de Janeiro nung asayatsü ayongba Rio Olympics nung shilem agitsü asoshi shimba asayar tenüng tarensen yashi, Brehostibar nü metetdaktsüogo.
Ajisüaka, Argentina’er football telok asayar tarensen nung Argentina captain, Lionel Messi tenüng medensemi aliba osang angazükogo.
Beijing nung 2008 küm ayongba Olympics nung gold agizüker telok nung densemsang, Messi tang US nung tasayadak Copa America asayamong nung shilem agiba yong pa Rio Olympics nung shilem magidaktsütsü lemtetba osang ka Martino-i metetdaktsüogo.
Yashi sangoktsüba asayar tarensen nung asayar 9 tenüng densemba osang angazükogo aser asayar 22 prongla densemba tenüng taresenbo Copa America asayamong tembangba sülen ang alima dang metetdaktsütsü renema lir.
2004 aser 2008 Olympic champions, Argentina telok Portugal, Algeria aser Honduras teloktem den aroki Rio Olympics Group D nung densema lir.