Messi-i takok angubaji Ronaldo den toktepba ajanga lir: Patrick

Barcelona, September 06 (Agencies): Argentina nunger Lionel Messi ya alima nung football asayar tajungtiba ta tetshir, ajisüaka taoba mapang Holland nunger striker Patrick Kluivert-ibo, pai Cristiano Ronaldo den toktepba medenibo pai iba jenjang ya metongtetla, ta ashi.
Taoba Spanish League season nung Messi lenisüba nung FC Barcelona-i takok nguyonga aruba ajanga taküm January nung pai FIFA Ballon d’Or sempet agizüka liasü. Real Madrid star Ronaldo-ia iba sempet ya tesüiba küm ana nung agizüka liasü.
Tang alima nung football asayar tajungtiba anaji Messi aser Ronaldo na lir ta züngshir, aser tena tsüngda toktepbaji ajanga Messi jenjang ajunger, ta Kluivert-i bilemer.
“Messi-i pa football ji yimya balaka nung asayar, ajisüaka pai Cristiano Ronaldo ama nisung ka (takok angutsü atema) nüngdaker,” ta Kluivert-i Voetbal Zone dang ashi.
“Asaya ajungaji tayongzükba ka ta agia asaya ajak nung tajungtiba merangtsü atema pai nisung ka nüngdaker. Ajak dak alia tenaprong world class asayar aser jenjang ka nung lir,” ta taoba mapang Barcelona nungi nüngtugu asayar Kluivert-isa ashi.
“Tang Barcelona nung tongti asayar ka dang lir: Messi. Kü mapang nungbo yangji (Barcelona) nung tongti asayar aika liasü, ano külen külem asayartem medenibo Messi ji tazüngla asütsü,” ta arishi küm 39 tejen asayar-isa ashi.
1998 küm nungi 2004 küm tashi Barcelona nungi asayaba mapang Kluivert-i goal 90 agütsüogo.