Messi-i tepuokdak ita 21 puoktsü temerenshi agizüker

Barcelona, July 06 (Agencies): Spain kübok Barcelona nung tentetba okadak kati Barcelona football telok nung tongti asayar, Lionel Messi tepuokdak ita 21 tashi puoka ayutsü temerenshi tanü, Bodbar nü agütsüogo.
Saru shitak magütsüi ochimashiba ken o 3 tashi nung aitsüba sülen okadaki tan Argentina nunger Messi merenshiba osang jangjaogo.
Okadakisa kasa ken o nung aitsüba sülen Messi tebu, Jorge-a ita 21 tashi tepuokdak puoka yua merenshitsü o bendang tanü agütsü.
Ano, Messi aser tebu na nem okadaki tanü agütsüba o bendang tanaben reprangshitsü onük Spain nung tentetba Supreme Court ajanga benoktsü temeten agütsüogo.
Ano külen, tanü tepuokdak puoka ayutsü temerenshi agizük aka, Spain ozungi tepuokdak küm 2 tekübok puoka ayutsü temerenshi agizükertem asangsang nung tepuokdak puoka meyui parnok tendangtsü latetja aliba yong Messi aser tebu naprongi tepuokdakbo mamongtsü akok.
Tan aitsüba sülen okadaki Messi dang dollar sen million 2.21 aser tebu dang dollar sen million 1.5 senchi agütsütsü ozüng agütsüogo.