Messi nem asaya ka tenokdangba agütsü

Asuncion, Chiteni/July 24 (Agencies): Argentina captain Lionel Messi, Copa America asayamung tasembuba jenjang atema asayaba mapang red card ka achiba aser South American football nung ochi mashi aliba aitsüba sülen pa dang senshi USD 1,500 achi aser asaya ka nung shilem magitsü asoshi tenokdangba agütsü.
Gary Medel den mangatettep adokba sülen Messi nem red card agütsü aser iba sülen pai asayamung ya metenzükdang yongi asayamung ayongba linük Brazil nem kokdaktsütsü asoshi renemer lir ta aija liasü. Iba asayamung semifinal nung Argentina, Brazil-i tsükdakja liasü.
Messi-i, South American Football Confederation (CONMEBOL) nung ochi mashi agi sünga lir ta ashi aser medal agizükba sentong nung maden.
CONMEBOL-i Mongolbarnü ashiba agi, Messi-i jembiba o ya magizüktsü saka pa nem temerenshi kanga ulurabo magütsü.
Pa 2022 World Cup atema qualifier mezüngbuba asaya nung Argentina team nungi masayatettsü akok.
Argentina dak sendakba nung Mongolbarnü CONMEBOL-i Argentine Football Association tekolakba Claudio Tapia FIFA dangi official representative ama yoka aliba aginogo.
Copa America asayaba mapang aser iba sülen CONMEBOL-i Tapia aija liasü.