Messi nem tenokdangba agütsüba agienogo

Buenos Aires, May 05 (Agencies): International asaya pezü tashi nung shilem magitsü tenokdangba agütsür aliba tanaben reprangshiba sülen World Cup qualifier atema Argentina telok nungi Lionel Messi asayatettsü.
Chile den March ita asayadang Argentina-i 1-0 agi akok aser iba asaya nung arishi küm 29 tain Barcelona forward, Messi-i assistant referee dang mezüngmeshi o ashiba ajanga iba tenokdangba agüja liasü.
World Cup qualifier asaya Argentina aser Bolivia tsüngda asayaba nung pa masaya. Iba asaya nung Bolivia-i 2-0 agi Argentina madak takok angu.
Pa indang yimya nung tashishitsü liasü saka kuli tejangja mongutet, ta FIFA appeal committee ajanga ashi.
Taruba küm Russia nung FIFA World Cup asayatsü aliba asoshi Argentina anu maongka monguteti lir aser Uruguay, Venezuela aser Peru den asayaba mapang Messi-i shilem agitettsü.
Iba ken o nung Messi dang senchi sen £7,800 achitsü lemteta aliba agienogo.
Chile den asayaba mapang Messi-i asaya nung aibelenogo ta assistant referee-i totuyuba agütsüba ajanga pai tejashi agi referee den ain adoka jembiba camera nung angu, saka iba mapang pa nem card magütsü.
FIFA World Cup nung asayatsü atema qualifier asayaba nung telok 10 rongnung Argentina ya pongububa jenjang nung lir. Iba telok nungi temaba jenjang pezü nung alirtem pasasa World Cup nung asayatettsü aser jenjang pongububa nung aliba telok ya ‘play-off’ asayatsü.
FIFA World Cup qualifier nung Argentina ya August 31 nung Uruguay, September 5 nung Venezuela, October 5 nung Peru aser October 10 nung Ecuador den asayatsü lir.