Messi yiruba ajanga Morocco den masayatettsü

Metsüremi/March 23, 2019 (Agencies): Taruba hopta Argentina aser Morocco na friendly asaya nung Lionel Messi masayatettsü. Hokolbarnü Venezuela-i 3-1 agi Argentina akokba asaya nung pa yiruba sülen taruba hopta masayatettsü.
Russia nung World Cup last 16 nung tsükadokba sülen Barcelona nungi nüngtugu asayar Messi, ita ti tashi national team nung masayaai liasü. Iba mapang nung pa friendly asaya trok tashi nung shilem magi.
Atletico Madrid indang Wanda Metropolitano stadium nung tamakok anguba sülen Argentine Football Federation-i Messi yiruba osang Twitter ajanga lemstepa liasü.
Kasa mapang nung Gonzalo Martinez-a tebi yiruba sülen taruba asaya nung masayatsü.
Venezuela den asaya nung Salomon Rondon aser Jhon Murillo nati asaya mezüngbuba shilem nung goal kaka idakja liasü.
Iba sülen Argentina nungi forward Lautaro Martinez-i goal ka küptok saka Josef Martinez-i goal tasembuba idakja parnoki asaya akok.
Messi asoshi par linük tenüng nungi asaya 129 kanga mejungji tenzük aser Newcastle forward Rondon-i long ball ka kanga junga agizüker Argentine goalkeeper Franco Armani adena mezüngbuba goal kanga junga metsüoktsü.
Iba sülen asaya mezüngbuba shilem atemtsü minute ka dang anunga lir arishi küm 23 tain Murillo-i Venezuela atema tanabuba goal idaktsü. Pai par linük tenüng nungi 17ben asyaba nung goal asem idakja lir.
Asaya tanabuba shilem nung Argentina nunger asayar Martinez-i par team atema timla agüja goal ka idaktsü ajisüaka asaya atemtsü minute 15 anunga lia Martinez box telung nung alangdaktsüba sülen penalty metsütsü asoshi maongka agütsü, koba pai aibelen mesüi idakja liasü.
Mongolbarnü Morocco den asayatsü aliba asaya ya taküm June aser July nung Copa America asayatsü aliba atema ternemshiba ka asütsü.