Mesü akhaba ken o nung Salman Khan nem bail agütsüogo

Actor Salman Khan nem Küptoknü bail agütsüba sülen Jodhpur airport-i arudang tangokba noksa nung angur.

Jodhpur Rongchii 7, 2018 (Agencies): 1998 küm mesü akhaba ken o nung Küptoknü Salman Khan nem sen lakh ka personal bond nung District aser Sessions Court Judge Ravindra Kumar Joshi-i bail agütsüogo. Ajisüaka petitioner aser Bishnoi lokti-i iba ken o nung obendang agütsüba ya Rajasthan High Court nung benokshitsü asoshi sentong lir.
Ken o lemtepba anepdang tembanga liasü saka Judge Joshi-i post-lunch sülen ang iba osang ya agütsütsü asoshi telemtetba agi. Salman-i personal bond sen 50,000 den ano sen 25,000 alang tanga bond ana agütsütsü nüngdaker. Ajisüaka arishi küm 52 tain actor ya linük adena bendangleni onera okadak nungi temelaba meshitsü nüngdaker.
Salman indang okatsür Mahesh Bora-i iba obendang ya pelashishia agizükogo.
Küm 20 tejakdang Salman-i mesü ana akhaba anema Bishnoi Samaj puri ken o ya benoka liasü aser parnoki ashiba agi, iba obendang anema parnoki High Court nung ken o benoktsü.
Bishnoi nungertemi iba mesü (blackbuck) ya parnok Guru Bhagwan Jambeshwar shiba dang Jambaji ta ajar pa reincarnate asüba ta züngshir.
Salman aser tanga Bollywood nung actor tem, Saif Ali Khan, Tabu, Sonali Bendre aser Neelam nunger 1998 küm Mongputeni (October) 1 aser 2 nü Kankani yimtsüng anasa reserve forest kati shikari oa liasü. Iba mapang nung parnok “Hum Saath Saath Hain” film tetangokdak liasü.