Mesüngjemtetba Ayodhya

Uttar Pradesh nung Ayodhya yimti ya India nung tamangba yimsü ana, Hindu aser Muslim nungertem na prongla asoshi temeshi yimti lir. Khristantem asoshi Bethlehem ama, Uttar Pradesh state kübok Ayodhya yimti ya Hindu nungertem asoshi parnoki külemba tsüngrem Ram asodak lir, iba tangatetba jagi parnoki iba yimti nung Muslim nunger tekülemdak ki melena Hindu nunger tekülem ki tuluka yanglua yuner. Ano kasaji, Muslim nunger asoshia Ayodhya yimti ya temeshi lima ka lir, kechiyong iba yimti nung aliba Saryu ayong anasa leper ka nung Adam’er semchir Shea arem ta parnoki jembir, kechiyong Muslim nunger otsüa Adam, Abraham, Ismael aser Isak nungertem nungi tenzüker. Atangji, Hindu aser Muslim nungertemi jembiba otsü anapronglaji shitaka ta asütsüsa tezüluba kuli kecha maka saka tebang o agi angazüktepa aruba otsü lir. Hindu nungertemi ashiba agi, akhidang Muslim chuba Babar yimsüsüba mapang par tongti sepai Mir Baqi-i lenisüba nung 1528 küm parnoki Ayodhya nung Ram külemba tenla ki raksatsür yangji Muslim nunger tenla ki Babri Masjid yanglu. Ajisüaka, 1528 küm jakdang Ayodhya nung tang Babri Masjid yanglua akadakji shitakba Ram tenla ki yanglua liasü asü mali asüar mejangjatetter, kechiyong yangji Ram temple liasü ta shingaia kuli magütsütetter. Atangji, Ayodhya nung Ram aso aser Babar chubai Ayodhya nung Muslim tenla ki yanglu. Tetezü, akhidang nungi Ayodhya yimti ya Hindu nunger aliba yimti ka liasü saka Muslim nungertemi atsüngteta yimsü asü. Tanü Ayodhya nung Hindu aser Muslim na tsüngda meputep adok tenzükba otsü teraji ibaji lir. India ya British yimli kübok aliba mapanga Ayodhya nung teti Hindu nunger o Muslim nunger na tsüngda Ayodhya nung Muslim nunger tenla ki yanglua aliba dak sendakba nung meputep adoka liasü. Iba kasa tebilemtsü jagi India yimten nüjiso ngur külena mapang mapang shia yimten nung khuret bentsür arur. Iba tebilemtsü onük ya ajanga V.P.Singh aser Chandra Shekhar nungeri aniba government-a kanga timtema aruogo aser 1992 kümbo Narisimha Rao-i aniba Congress government mapangang ano tensa tamajungba küma Ayodhya nung lendong atalokogo. Iba mapang, 1992 küm December 6 nü Ayodhya nung India tesem balala nungi sendenba Hindu nunger zünger mezüngma adenshia yur Muslim nunger tenla ki raksatsür Ram tenla ki asütsü merangba mapa atalokba asenok aikati nguogo aser angashiogo. Iba sülen kasa ken o ya maneni okadak benoka jembi saka tamangba yimsü tulu ana tsüngda, tezüluba kuli maka ser tenla ki kimong raktepba ken o ya bendangtsütsü temela masü, anungji tang tashi Supreme court nungi iba ken o mebendangteti lia, ano tang Ayodha nung Hindu nungertem mongdang alitsü adenshidagi. Iba mongdang ya Vishwa Hindu Parishad (VHP) teloki ayongzüker. Tang tashi nung Ayodhya yimti nung India tesem balala nungi VHP sülen anidaker Hindu nunger tamangertem aika adenshidagi aser tetsübu nung Muslim nunger aika Ayodhya nung pei ki toktsür tangaleni ogo. VHP teloki ashiba agi, iba mongdang nung adentsü asoshi Hindu nunger lakh asem shi linük tesem balala nungi adenshitsü. Hindu yimsü asoshi taküma bendanga agütsütsü renema aliba tamangertem lakh paikaji adenshiba nungji shisabolutsü tuluka lir. Atangji, UP government-i lendong mataloktsü asoshi terenemtsü tashi renema lir tabo sangdongogo, ajisüaka UP Chief minister, Yogi Adityanath ya Hindu nunger putir ka lir aser pai Ayodhya yimti aliba district Faizabad district ya Ayodhya district ta melentsü tejembidak nung tang Ayodhya nung VHP teloki mongdang ya ayongzüker. Iba ama tensa mapang ka nung Ayodhya nung  Hindu nunger lakh asem adenshia Babri masjid raksatsür Ram temple yanglutsü tenzükra, Hindu nunger asoshibo takok tuluka asütsüa akok saka India asoshibo takoksa tuluka asütsü.