Mesüngjemtetba tanela

R. Imkong Lkr., 4th Mile, Diphupar – Dimapur

Tanela ya taküm aliba tanela lir. Tanela ya tapu ana lir, ka temeshi tanela lir, aser tangabaji temenen tanela ta ajar.
Temeshi tanela ya mezüng yongi Adam dak keter yanglu, aser pa ya alima meimchir rongnung mezüngbuba nisungbaji liasü. Aser Tsüngremi pa nem tzüyim nung angotem aser anüng nung ozütem aser kiset shiruru madak aser ayazüba ajak madak kibur akümtsü mela. Aser Tsüngremi parnok moatsü ta Lipok tapu 1:26 aser 28 nungji shia angur. Aser tanabuba nung Eden tsüki inyaktsü aser anüktsü pa nem nungloktsü ta Lipok tapu 2:15 nungji shia angur. Tasembuba nung tajung o tamajung metetba süngdong nungi nai techi aser koba anogo nung iba nungjagi chidir na atangji asütsü ta Lipok tapu 2:17 nungji shia angur. Aser pezüpuba nungji Adam yarir asütsü Tsüngremi pa dak nungi tesaret agiteta tetsür ka yanglu aser pa nem kinungtsü asütsü agütsü ta Lipok tapu 2:22 nungji shia angur. Pungupuba nung parnok Eden tsüki nung alidang “peri” tetsürla külakoktsü, aser ashi, kechi anogo nung nenoki iba süngdong nungjagi süngjangji agizüka chidir, idangyongji nenok tenük lapoka Tsüngrem ama tajung tamajung akümtsü ta ashioktsüba angur.
Anungji tetsürlai peri ashiba o-ji angar süngjangji ongzüka achi, aser lai kinungbo nema agütsü aser pai-a tashi angaa achi ta Lipok tapu 3:4 nungi 6 nungji shia angur. Yamaji temenen tanela-baji per-ji liasü ta kuli tejangja angur, aser tanü tashi perji shiruru ajak rongnung tesempatsü aketba shiruru ta züngshir. Yamaji kechi aser koba oset-sa tesempatsü keta ali, itemji temenen ta züngshir.
Yamaji kibuba Tsüngremi sempaba mapatemji itemi lir; Asüküm tenük, teyazü temeli, tai maketba zü tokshiba teka, temenen tasa asaba temulungjang, tai inyaktsü kara-a asemba tetsüng, teyazü jembiba kuli, aser adianu rongnung rarabangsen prokba nisung. A.Shin 6:17 nungji 19 tashi nungji shia angur.
Aser alima nung Yisu Khrista menenpur atema kangki nung mangenlokdang temeneni meimchirtem madak yimsü asüba temaitsü, Simon Peter shiba Yisu nütsüng 12 rongnung ka liasü, Yisui pa dak temulung kanga lemteta liasü. Saka pa-a temenen nung tsükba angur, anungji Yisui Peter tang ashi, atangji ni nü dang ashir, taonung an-i makongtang nai ni asemben menangzüktsü ta shia liasü. Saka Peter-i Yisu dang langzüa ashi, kibuba, ni nü den tasütsü liaka na menangzüki malitsü ta langzüa liasü, aser tangar nütsüngtemia ajaki yamaji langzü ta Mathi 26:33 nungi 35 nungji shia angur. Saka mapang agi tonga arudang, Peter aser tangar nütsüngtemi Yisu dang nangzükba atem tu yazür aküm. Anungjiang meimchirtem ya temenen nisung ta jangjatsü mechi nung Peteria Yisu tsüngdang nangzükba kuli tu mekai kümdaktsü ta angur. Kechiyong sayutsüngir tapu 7:20 nung yamai ashir, atangji alima nung temeshipuri tajung inyakaka pai temenen mebenshiba nisung ka danga mali ta shia angur.
Yangi ano temeshi tanela o temenen tanela na ya anisüngzük mekai kanga yak-yaka mapa inyakteper ta asüba tatishitsü ka shiner. Oda ashitsü agi tena ya asenok meimcher kinungpu o kinungtsü na ama dangbo masütsü, saka tena ya ka tekolaklen nokdaka lira, tangabaji tetsünglen nokdaka alir ta metet-tsüla.
Yamaji temeshi tanela o temenen tanela naji kecha nunga putepa meliteter. Anungji mamangertem den mesütepi süngra külemi taputep, kechiyong temenen den temeshiba kechi nung puteptet? Aser ammang den tesangwa kechi nung puteptet? Aser mojing den Khrista kechi telongjem ali? Mesüra mamanger den tamanger kechi shilem aka? Aser süngyanglu den Tsüngrem tenla ki kechi nung puteptet? Anungji parnok rongnungi adoka balala liang ta kibubai ashir. Aser memeshiba kecha nunga tekongshi, aser ni nenok agizüktsü ta ashir, 2 Korint 6:14 nungi 17 nungji jangja-jangja shia angur.
Reprangang, tanela ana ya kodang süngjema meliteter, yamaji revival ken nunga süngjema meliteter ta atener. Kechiba süngjema meliteter? Pa mesüra la dak tanela ka agi ajungshiba ajanga kodanga süngjema meliteter ta angatetdi. Aser ano mapang ajak nung medemer kati medemer ka tamang nung tashi idakja Khristan ka yimya tesayuba nung maneni ajungshiteper, aser telok nunga tanela tajung akari shilem tajung agia ajungshitepa sayutsüngiteper aser telok ajak tzüra temdakja kuli tajung agütsüteper. Aser nisung aika tamang nung atsüngzüka oa aliba nungi tanaben tashi itshidakja Tsüngremi mulungba nung jajadaktsür. Idangjiang tanela kar samaa oa aliba nungi kümzüka anir arur ta metetdi, ya koda tesüngmangtsü tanela sempet tulu lir. Item purtem jagi mapa tajung aika inyaker aser temeim tamang agi mapa küma sayuteter aser tajemrepba tia nung alirtem mesoa taküm tangi tanaben anir aruteter.
Yamaji temenen tanelai-a kodanga süngjema malir, saka parnoki meja ama ammang sangwa kecha tebendang mekai mapa maneni inyaker. Kechiyong parnoki temenen mapa ka meyinyak tashi aser tangar ka malangdaktsü tashi amoa moteter. A. Shin 4:16 Aser repranga liang, nisung kar dakbo tenük merem ya tali alir, aser parnok jagi pei dak apet mapet khen agi meshisadanger, saka tangar majung indang tali jembia jajar, aser item jagi adianu ka takoksa angudangang parnokbo pelar, aser tangar ka kecha mekai timtema angudangang parnok temulung achir, aser tangar timtemerji khen agi hau ta mali, saka parnok peria akabajiang konang nüngsang küma jembir. Aser tangartem kar khen agi anisüngzük mekai mapa meranga inyakba angudang, pabo kanga anisüngzük-süngzüka mena alibaji kanga jangra atemer. Iba ama tesempatsü aketba nisung ya tanga kecha agi masü, saka pa dak aketba temenen tanela kobai süngjema meliteter, iba ajanga mapa tamajung aika inyaker, aser balakata sensakertem alima nung lia, molumi nung rongdaktsür. Aser tang shiyonga aruba jakla yimyatemji meimchertem kar dak keta lira, temenen tanelai pa/la dak mapa sashia inyaker ta metettsüla. Yamaji temenen tanela ajanga mapa tamajung kechisa ataloka inyaker, itemji temenen tanela ajanga prokba süngjangtem atanger aser ibaji jongkai adoker ta angatetdi.
Yangi lanurtem dak ajemdaker alima otsü ka shiner, tanü lanurtem tia ya khen junga reprangdangdi arungma. Parnoki parnok taküm piyong liyonga aotsübaji kangabo süoki ia mebilemer, saka tanü ajung asa-a liyonga aotsübaji tang bilemer. Saka anogo aben pa mesüra la den temenen tanelai mapa tamajung kabosa inyaktsü anishidar ta parnoki memetetter.
Yamaji tsüngsang mopung tajung ka shimteta parnoki picnic-i aotsü temulung nung nung shisateter, aser ibai temenen tanela ajanga ajungmesodaktsür ta parnoki mebilemer mesüra merajemer. Aser Aiür-Asangur-tem tu ayongteper arem tesem talang kati picnic-i aotsü atongteta pei pei akaba chiyungtsütem tapu tapu pei akokba yari abener. Aser parnok rongnung karibo temesepba yi “wine” aser mozütem tu pocket nung abener. Aser parnoki kodang parnok longsuteptsüba tesem tu tonga arudir, tamasa mi aputeta yur kati ka metetpelateper aser parnoki bena aliba ciyungtsütem tu lemsatepa chia ajemer aser kati ka taoba ta züngshitepa longsutepa meimtepa tenzüker, aser kati ka kanga akhümtsüputepa, pelatepa, benjongteper aser parnok rongnung kari Guitar tema ken atener, aser kari dance süteper ta aliba mapang nung tu, parnok rongnung kari yi “wine” bena aliba tu refreshment atema ta ser anganüa arur aser akhi mapang nungbo kodanga mejemdangi aliba purtem tu-a iba mapang nungjibo ajemtsüsa akümer, iba sülen parnok temang tu tesüngmangtsüka anokshia anokshia ken tu tenteper aser parnok tu oda oda-bo apangteper jokshishia alidang, ano karibo kechi mozüar memeteti tang parnok achi-ajemba chiyungtsütem nung tu meyokteper enoktsür alitsüa shibaibo metet aser item chiyungtsütem-tu chia jemer külenbo mapang tatsüka tsüngda nung Aiür-Asangurtem tu sense tajung tu samadaktsür aser parnoki parnok sasa kecha memeteti akümer aser tapi agi tsüngsangteper. Aser oda oda-bo parnok tu tesem tesem shia nung laochia, laochia aoer aser karbo ali tesa nung ondaka mejangadoker aser karbo anasa aliba ayong tu bushia aoer aser joko parnok dak temang nung tu tashi melie akümba ajanga parnok sasa apangteper ayong yima aliba nung tu tzü chikotsü aodang aoksa ka külemi tang merepoka ayir aser mapang tatsükabo ango jilo-tu yia kazüteper.
Saka tatem nung karbo anarongdena medemer kar teyari ajanga ayong-küm nung atsüteta taküm tu kümzüker. Saka tia maka karbo ghonda-sa ghonda “hour’s together” tzü nung aliba angotem den tu temba tinu yimteta jangratema tzü telong nung tu alir.
Iba ama otsü ya asen Naga lima tesem balala nung atalokba angashia aruogo, saka talisa Dimapur temeket ayongtem nung atalokba asenok ajaki angashia aruogo, aser angashir alitsü ta amanger. Kangasa sasaseter, kechianga meshiaka!
Aser ano anünga aliba picnic-i aortem telok rongnung tu aika dak tashidak tapu balala agi shirangba alitsüa shibaibo metet. Iba dak alaka ano kar dakbo meshitetba taraktem keter alir, aser tesülenang kechi taraksa (scars) ali meilongi tang tsüraburtem aser adianutemi meteta akümer. Idangjibo joko shi nung takoksa anguba den, maksü den, tanela “soul” asoshi tesama tia tulu ajurutsüsa akümer.
Aser iba ama mamatetba tatalokba otsütem ya tali jangja metet-tsü mechi nung ni yangi onok lanuwa school azüngdang Ao kaket “Vernacular” nung sangru “poem” ka yamai azüng, aser iba sangru ya ni tang züngshi masü, saka aikati züngshir alitsü ta amanger. Sangru-ji yamai zünga liasü. Shibai mopungji angu? Nia, nai-a mangu, shingaia mangu, saka süngdong kongsangtem, aser arem süngo-li-ou-tem mopung agi oner aoba asenoki angur aser ano ali nung aliba auyi(dust) koleni mopungi oner odir, ilen jagi mopungji ondar ta asenoki meteter ta azüng. Yamaji tanü Aier-Asangur-tem picnic-i aoba tatalokbatem tu iba mapa ajanga meteta akümer, tatishitsü ka yamai ataloker, asen lima arem nung ansotsü yata-entartemi arem, ayong ajak nemtena senzür asü nungji parnoki arem ayong lenden kong sadok-sadoka ali, yangji khen anisüngzükdi ta ser amendang iba tesem nungji whisky bottle tilala tazüng kar ileni aser külenji merepshia endoka aliba angur, aser iba den ano kechi mozüar memetet packet tilala tazüngtem kar angur. Aser amtsük tajungla sen aika alangbatem tu tesem tesem nung prokshia aliba sosang, koyatemi chir tanungtem tu angur. Aser ano aiü-asangurtem tesempatsü süoshia kar endoka aliba angur, aser mi apuba mimong anasa tu angur. Idangji yata-entartem tu kanga süngmangseta repranga kazür adoker. Yamaji tanü lanurtem picnic-i aor ta jembiba tu yamaisa “maikuitsüka” “unforgetable events” longsuteper asü-no ta otsü alongtepdang jembiteper.
Yamaji otsü nung ashi ama aser Ao sangru nung azüngba ama mopungji shingaia mangu, saka arem nung süngolia aser auyi (dust) koleni mopungi ponger aoba angudang, mopungji ilen jagi ondar ta shiteter. Tanü lanur aiür-asangurtem tu koma, kodasa liteper aser temenen tanela nem komasa anishidaktsür, itemji parnok tsüngnep “foot-print” agi metetadoker ta angatetdi. Anungji, tanü asenok tsüraburtem aser temeim lanurtem, anogo shia asenok den temenen tanelai asenok sülen anishidar ta metetdi aser pei takümji kanga kümdanga meita atatsüla ta ayongzüker.