Meta talang atema Motorbike Ambulance Service tenzük

Mumbai, August 04 (Agencies): Shiranger nem tekeraba nung teyari agütsütsü asoshi Maharashtra sorkar-i motorbike ambulance service sayaogo.
Iba sentong ya ’emergency first responder medical service’ asoshi item ambulance ya ‘108’ free helpline number nung call süa agitettsü aser iba telok ajanga ambulance gari tulu mesenzütetba tesemtem nung tali tongtipang sa paramedics temi shiranger anepalutsü.
Iba sentong ya tendangtsü asoshi motorbike ambulance 10 Marine Drive, south Mumbai nung yashi Maharashtra Chief Minister, Devendra Fadnavis aser Shiv Sena tir, Addhav Thackeray nati sayatsü.
“Mumbai nung traffic aika aliba mapang aser Melghat ama tesem nung tetsüng pezü aketba gari mesenzütetba tesem nung motorbike ambulance ya kanga nüngdaktsü,” ta CMO Maharashtra-i Tweeter nung zülutsü.
Tang iba sentong mezüngbuba amshir asünung item motorbike ya Bhandup, Malad, Mankhurd, Dharavi, Nagpada, Charkop, Goregoan, Thakur Village, Kalina aser Khar – Danda tesemtem nung jajatsü. Iba service ya Bharat Vikas Group (BVG) ajanga agütsütsü.
“108 control room nung call agizükba sülen anasatiba tesem nung aliba motorbike ya yoktsü. Shiranger aliba tesem atongba sülen tetsüng pezü aliba ambulance gari maru tashi iba motorbike nung aliba paramedic ajanga yaria alitsü,” ta BVG nung senior executive kati ashi.
“Royal Enfield motorbike nungi ambulance melen aser iba ambulance nung ajungben nüngdakba osettem inoka lir aser iba ya angati asütsü,” ta lai shisem.
“Shiranger ka kümzüktsü asoshi second ka ya senti lir aser iba ama tensa ka nung shiranger atongtsü asoshi traffic nung gari tulu sadema mejajateti mapang talangka agir. Anungji iba motorbike ambulance ajanga tekeraba nung shiranger yaritettsü,” ta iba sentong sayaba mapang BVG Chairman, H R Gaikwad-i ashi.
Iba sentong nung nükla tajung aliba nguteta Ato Kelonser Narendra Modi-ia Maharashtra CMO indang tweet ya retweet asü.