Methaneilie-i mejemba ACAUT theme song sayaogo

Kohima, June 17 (TYO) : Taoba NLA Speaker aser Advisor Nagaland Tribes Council (NTC), Z. Lohe-i Hokolbarnü Against Corruption and Unabated Taxation (ACAUT) Nagaland indang theme song sayatsüogo.
Iba ken ya Naga nunger nüngtugu kentener Methaneilie Jutakhrie-i mejem aser Rattle and Hum café, Kohima nung tanü sayaogo.
Naga nunger loktiliba nung teyarir malirtem, senzüka yutsürtem aser tangar memenepertem atema ACAUT-i noktaker. ACAUT-i konang mesüra tajangzük marishir aser tangutsü kecha meimlai dang rarar, ta tanü ken sayatsüdang Z. Lohe-i ashi.
Sentong nung ken mejemer Jutakhrie-ia o tatsüka jembidang Naga loktiliba nung ochimashi tera yanga aliba atema kanga nemjema bilemer ta metetdaktsü.
“ACAUT yaritsü aser pusemtsüji tang mapang tajung lir” ta paisa tayongzüba agütsü.
“ACAUT theme song ji English aser Nagamese oshi anaprong nung mejem aser iba ken ajanga ochimashi agientsü aser nisung ajaki ochimashi anema rara nung shilem agitsü ayongzüker,” ta Methaneilie-isa shisem.
Sentong nung ACAUT consultative body züngsem, Khekiye K. Sema, IAS (retd)-i ACAUT nem tenüngsang agütsü aser nisung aika atema iba telok ya teimla ka ama lir ta ashi.
“ACAUT-i tim masüba inyakyim anema noktaker aser lendong ataloktsüsa tensatem ajuruaka ACAUT-i loktiliba nung khurettem atema tasü itta inyaker,” ta Khekiye-i shisem.
Sentong nung mendenji convener liaison cell, Simon Keliu liasü aser Kohima Chamber of Commerce and Industry (KCCI) President & Nagaland Voluntary Consumers Organization (NVCO) President-ia o jembi. ACAUT züngsemtemi Methaneilie dang pelaba metetdaktsü.