Metokmepri jenti liaka Covid-19 den raratsü IMDH renema lir

Mokokchung, April 2 (TYO): Tesem aika nung metokmeperi liakasa Covid-19 tashitak den raratsü onok renema dang lir, ta Mokokchung Imkongliba Memorial District Hospital (IMDH) ketdangsürtem den iba osangbeneri jembidang parnoki metetdaktsü.
IMDH nung Covid-19 dak sentakba nung terenemshiba (Mock Drill) maparena anaben tashi agiogo, ta parnokisa ashi.
Tangji shirangertem anepaludang tashitak memenatsü atema asemba PPE kar den mozümora aser hand sanitizer ishika onok ket tongogo, saka PPE ya khen agirbo tanaben magiteter asünung, tang aliba yagibo meperitsü, iyongji, IMDH-i parnok jurila nungdakba osettem kar tangalen nungi order süa lir aser itemji karbo tongogo aser ano kar matong lir, ta parnokisa ashi. Covid-19 agi shirangertem anepalutsü atemaji tang onok ket nung aliba osettem yagi meperitsü, ano iba dak sentakba nung tanga tongtibang osettsüset kar den nübu nungdaker, ta parnokisa shisem.
Mokokchung nung Covid-19 hospital balaka mesemtsü asoshi sorkar nungi tetuyuba ka aru, anungji, tang Mokokchung T.B Hospital alibaji tesütep tesem ka asünung, ibaji Covid-19 hospital asütsü mesemteter liasü aser timtem aika liaka T.B Hospital-ji khen atema IMDH Isolation Ward kati belendaktsüogo.
Iba ama renemshiba mapang ka nung, ano sorkar nungi IMDH-ji Covid-19 hospital akümtsü tetuyuba ka arua lir, aser April 6, 2020 nungibo tetuyuba tasen ka magütsü tashi shiranger tasen kata admit masütsü. Iba den ano tang mozükidang munga alirtemjia April 6 tashi nungbo Lenjem Hospital-i belentsüla aser emergency case dak alaka IMDH nungji shiranger shinga mereprangtsü. Iba tetuyuba tasenba yagi IMDH ketdangsürtem aser doctor-temji tera ratamataba tia ka nung lir, ta osang ajanga angazüker.
“Lenjem hospital nungji doctor tejang ka dang lir, süra tang kanga mejungi shiranga alirtem aser shiranga arurtem (OPT)-ji shirnoki reprangtsü?”, ta doctor kati iba osangbener dang ashi. “Kohima aser Dimapur den medemdangla masü kechiyong idakjibo private doctor-tem peria lir, anungji, nungdakba mapang parnok teyariji agitettsü saka Mokokchung nungbo yamaji masü, doctor kanga apara”, ta paisa timtem kar lemsatep.
“Doctor-temji anogo lemsar duty melentepa inyaktsü aser melentepba mapang duty inyaka alirtemji anogo 14 bo tesem balakati belener quarantine nung ayutsü, iba mapang nungji nübu apara asünung, tang shiranga alirtem aser emergency case arurtemji shirnoki reprangtsü?”, ta parnokisa terataba kar lemsatep.
Tang IMDH nung ya doctor ajak senteper 14 lir aser nurse 60 shi lir. Tangji IMDH nung shiranga amunger parnok 20 shi lir. Item rongnung koda masürtema densema lir, anungji, tangalen belen nungbo talisa cancer agi shirangertemji timtem tulu ajurutsü akok, ta doctor-temi arendaka bilemer.
Mokokchung nung T.B Hospital tang koba Covid-19 hospital mesema lir, yangji nisung 50 tashibo yutettsü saka yangji Covid-19 shirangertem anepalutettsüsa nungdakbatem abensaa mali aser IMDH-ji Covid-19 hospital asütsü belenyonga yangjia nungdakbatemji peria mali, saka kodang IMDH-ji Covid-19 hospital kümdir, tang shiranga alirtem aser emergency case arurtem atema tebilemtsü tulu ka asütsü, kechiyong tang IMDH nung inyaka aliba maparentemji kecha meinyaktettsü, ta osang angazüker. Tia junga tang tashibo IMDH nungi iba tatishitak dak sentakba nung testing atema yokba aser temulung melemteti bilemba kata arua mali.
IMDH atema telok shirnokisa mapa tajung inyaka tenla tulu agütsüdaki, item lokti tentet ajak dang IMDH ketdangsürtemi kanga pelaba lemsatepa liasü.