MeToo ken otem reprangtsü atema Maneka-i luden ka tentet

New Delhi, Mongpuateni/October 12 (Agencies): Tanü Women & Child Development Union Minister, Maneka Gandhi-i, #MeToo ken otem reprangtsü atema lar ministry-i züngsem pezüi akumba committee ka tentettsü, ta metetdaktsü.
Osangbener den jembidang Maneka Gandhi-i, #MeToo campaign kübok tawa tetsürtemi ken o balala agutsüba reprangtsü atema retired judge pezüi akumba luden ka tentettsü, ta metetdaktsü.
Laisa, tetsür anema inyakba ken otem ajakji lai amanger, ta ashi.
“Ken o agutsür tetsür shiai timtem ajangshiogo ta ni amanger. Mapa inyakba tesem nung tetsür anema inyakba mapatemji magizüktettsü,” ta lai ashi.
Interview ka nung jembidang Union Minister-i, “MeToo campaign kübok ken o agüja aliba ajakji reprangtsü atema senior judicial aser legal nisungtemi akumba züngsem pezü committee ka tentettsü,” ta metetdaktsü.
Iba committee jagi legal aser linük temzüngtem nung ajemdaker item ken o reprangshitsü, aser nüngdak dang süra item ozüngtem tesashiba akumtsü atema parnoki ministry nem tebilemba onüktem agutsütsü, ta lai ashi.
#MeToo campaign ya mezüng 2017 küm ‘hashtag’ ka ama Twitter nung tenzüka liasü; iba mapang nungji Hollywood nung producer, Harvey Weinstein-i tetsürtem anema inyakba atema tetsür 70-i pa anema ken o aika agüja liasü.
India nunga taoba ita (Rongjui/September) actress Tanushree Dutta-i actor tain, Nana Patekar-i la dak tim mesüi benshi, ta ken o agutsüba nungi tenzüka iba campaign tenzüka liasü.
Dutta-i iba campaign tenzükba sülen India nung tetsür aikati teburtem anema ken o agutsüogo.