Metsü mashi nung memetsütsüla

Anogo aika nisung shinga among adena moudaktsüi nokdangba sülen tang anogo shia nisungtem pei nüngdak senzütsü atema tenemi tanemi chiokdagi. Iba jagi nübortem aikati tashidak wara ajak süitemer ama bilema pelatepa akhi yimya nung mashimashi oli ora süa alitsüa akok. Ajisüaka, ano nisungtem aika alidak nungtepa maotsü aser nungtepa mamentsüba dang masü saka metsüa mashimashi nung metsütsüa memelar. Asenok asoshi mapa tasaktibaji aji ka asütsü. Asenok metetba, asenoki sübuba, asenok chiyonga ajemba, asenoki jembiba aser asenok senzüsenpongba jakla aser yimya apibo tang yabo shingaia shinga dang kilong nung mesüra yimdong nung senzüdang mashimashi nung metsü temetsü ta ashitsübo nüngdak madoktsüla. Ajisüaka, asenok libaliro reprangdangra, tetsüng agi mesüra bus nung senzürtemji ken toktsür, necktie agir gari tajung nung senzürtemia dena gari toudak nung pei mena aliba gari dena menentsüsa sali metsü metsüba asenoki angur. Asen kidang dang masü saka pi kidang dena atep nung mi apudak mesüra kinük ka bushia orr asenoki metsü metsür. Ashiko, mi apudak metsü metsübajibo mi agi rongdoktsü ta bilemer metsür asütsüa akok mesüra kinük nung metsübajibo tema nungi shingaia mangurji ta bilemer metsür alitsüa akok. Nagaland nung government office ajak nung metsümeshidak aser kinük ajak sali metsü agi jaketa menener angutsü. Iba ama awashi memetetba mapatemji melenshidaktsütsü asoshi Tsüngremi yokba amai tang covid19 tashidak ajanga tangatetba agütsür. Iba tashidak wara ya kanga tamajung aser tesashi saka iba tashidak nungi jenbutsüba yabo temela, kechiyong asenoki asenoksasa merükmejua lira, iba kija jagi iba tashidak ya nokdangtettsü. Talisa, asenok nem covid 19 ajanga bener arutsüba temelenshi tajung anaji, teti sapon agi teka metsüktsü aser mashi mashi nung metsü memetsütsü. Atangji, kimalen teka menentsüsa jajadang teti mozü tzü (sanitizer) agi teka merüktsü aser teni tebang sü agi nembanger jajatsübaji kanga tongtibang, ajisüaka teti mozü tzü agi teka shidokbajia majung, anungji akok tashi dettol aser lifebuoy ama sapon amshia teka metsükra, ibajiang tajungba ta temetetter aikati ashir. Asenok temang merüka alitsüba aser metsü mashi nung memetsütsüba ajakji asenoki meteta lir saka mapa küma mamshitetter. Item awashi yimyatem ya benshitsüba ya tongtibang masü amai asenoki bilemer saka tashidak mesen atemdak tesem tajungtibajibo asen tenüktelen memerüki alidak aser metsü metsüdakji lir. Ano, tang ama coronavirus yabo metsü ajanga menateper, anungji kodang asenoki aji angatetter sali metsü dang masü saka sali machirtemia dena metsü mashi nung metsübaji tesempatsüka dang masü saka lendong tulu aketba mapa ka lir ta kümdang tenzüktsü. Atangji, kilong nung asüyonga mesüra kimalen asüyonga metsümeshiner mesüra metsü metsüner saka metsümeshidak tesem aser metsü metsüdokdak tesem melira, nisung ajaki kodamasü maremteti, tang amai mashimashi nung metsümeshitsü aser metsü metsüdoktsü. Iba jagi asenok lendongi aitsü aser asen lima topur ajung maparen aika nung mejungi akümtsü. Item ama nüngdakji angateta government-ia aser asenokia nübortem anisüngzükdaktsütsü asoshi dang masü saka asen lima merüka ayutsü atema tesem ajak nung metsümeshidak aser metsü metsüdokdak peria yanglua yutsütsüla aser item tesemtemji mozü tzü dena amshia teti merükmerüka shidoktsüla. Tashidak nokdangtsüba ya mozü achiba kisüng agi masü saka asenoki kümdanga libaliruba agi nokdangtetter. Kümdanga libaliruba nungji, atangji, achiajemba dena lir, anungji asenoki tebang dang ajung asaa masü saka temang junga alitsü asoshi bilema chia ajemtsüla. Tashidak aika mozü masü saka tzü tajung kisüng jempet jema aliba agi nokdanger aser aneper. Aji oda, coronavirus tepsettsü asoshia asenok merükmejua aliba den külemi tzü tatsük agi terok leta shidoktsü aser ajemtsü saka metsübo mashimashi nung kenyongi memetsütsü ajungshir.