Metsüjang mesamadaktsüi alu ayimtsüla

Tanü asüng lanurtem aikati jang aser chi dak alaka tsükbo mangu, kechiyong parnok tain akümba mapang asen lima nung asenok tsüraburtem alu ayimba anen. Asenok chi chiyonger kin ser nung chi ya kong nungi koma züsenteta arur aser akümer aji memetetbaji tebilemtsü tulu lir. Iba jagi asenoki chiyongtsü züsentettsüba yabo asenok mapa masü amai, talisa, lanurtemi bilemer. Aji oda, asenok taküm alitsü asoshi chiyongba chiyongtsütem züsentettsü atemabo Assam aser Bihari nunger mapa amato bilemer aser asenoki asenok ket nung sen dang lira ojang, kecha shisabolutsü mali ta bilema pei temeten aser akhüm dena yoka sen bushir. Ajisüaka, ashiko sen yangku sünga semer chiyongtsü maka, bener marutet ayaa agi asütsüsa mapang tamajungka ajurutsübajia temenu maka. Item ajakji bilema akok tashi asenok tebok asüngtsü asoshibo tangar dak nendaka melii asena asensasa asen peribo züsentettsüsa senso shia nem khuretsa inyakdaktsütsübaji kanga tongtibang kümogo. Iba nükjidong nung tang Horticulture purtemi aluyimtsü asoshi ajungshiba den aluyimertem nem aonsutsü metsüjangtem lema agütsübaji aluyimba nung asentenshi tenzüker asütsü. Joko, asenok aika tsük lu masü election lu aser tiyazü lu dang ayimer asünungji, lanurtem taküm raksadaktsüba dang masü saka aluyimba mapatem aser nüngjakoja aika amadokogo aser tsük metsü dang masü saka alu nung züsentetba mersü, mapu, züngi, luli aser azüngken tapu balala tsünüa aliba ajak to metsü dena samadaktsüogo. Metsü dena samaba tetezüji aluyimer maliba akümba tamaitsü lir. Asen lima aluyimtsü tesem dang masü tzü mopong tajung, iba jagi kasa somomosa asüyonga asen lima nung adokbasa tajungba aser tayua talangba yutetter. Iba amaji mersüa, mentia aser mapu züngia asen lima nung adokba aser atangbasa tanangba aser tajungba chitetter. Item ajakji samadaktsür tanübo asenok tzümar lu nung aonsutsü aser sünganglijangtem tuluba, talangba aser tekaraba indaktsütsü asoshi mozü tapu tapu amshia tsünütetba chiyongtsütem alia achir. Asenok ya tangar asoshi tayokdak bazaar tuluka kümogo, anungji oda odabo chiyongtsü alitsüa maka tanü asen temeten ayokba amato asen temang dena tangar dang yoker alar mapa inyaktsü. Tanü asenok loktiliba nung “na kechi inyaker ?” ta asüngdang nung melangzütettsüsa nisung aika lir, kechiyong nisung teimbaka kecha meinyaker. Kibong nung nisung kati dang mapa inyaker aser iba jagi parnok kibongji taküm alir, tetezü tanüngba kinungertemjibo kecha mapa meinyaker. Asenok tebilemtsüji aji lir. Joko, asenok alu mapa toktsür talangka asünungji, akhidang tsüraburtemi amshiba mapok tsük, temerem tsük aser temesüng tsük ta asüba tsük metsütema makatsüa akok. Idakji aoksar, asenok tsük metsü bushitepa alu dangi meyiptsüba mapang tongogo. Atangji, akhidang alu mayim toktsübaji mapa meinyaknüba agi toktsü masü saka takoksa anguba agi toktsü, kechiyong küm piyong alu ayimba agi kibong aika tebok mesüngtet. Iba jagi aluyimertembo sensaker akümtsü ta bilem. Iba tebilembaji shitak liasü, kechiyong aluyimertem pei alu nungi züsentetba agi pei bok masüng sensaker aküm. Aji oda, ken dena “Temeimtsü aluyimer” ta mejema aten. Sensaker asünungji ajaki nüma reprang aser aluymertemji pei mapa agi pei nümamedangteti küma adok. Iba ama tia ka nungji shibaibo alu yimnütsü ? Ajisüaka, iba ama putu nungi tanübo aluyimba nunga putu tasen kati ayaokogo. Joko, tanübo zünga-shia metetba purtemi aluyimba putu lir. Aji oda, alu ayimdang teka dena meraksatsüsa semoktsü semer inyakba putu. Atangji, mozü mamshii ayimbajisa tajungba, kechiyong temang asoshia aji tajungba aser jenjanga aji tuluba saka inyaktsü tasak, anungji alima nung alir ajak peritsüsa züsentettsübaji makoker. Iba jagi alu nung nisung kanga mebelemi teimba züsentettsü asoshi mozü amshia alu ayimer. Iba denji tanübo mapa teimbaka machine aser gari agi inyakba putu lir, anungji aluyimertem makoksar. Atangji, tamasayongi alu tuluka yima metenzüktettsü akok, saka tanü lanurtemi tendanga aser tsük aser aonsutsü metsü danga mesamadaktsüi wazüka ayutsü asoshi aluyimtsü tenzükra, ibaji aluyimba nung asentenshi mera tuluka agir asütsü. Süngwa agidangbo asenok tebok masüngtsü, mesüra sen kija agi taküm melitettsüsa mapanga arutsü, aji meteta asenok ajaki pei yari pei jangraba lu ayimtsü ajungshir.