Metsümeshiba tesemtem nung angadi WiFi amshitettsü: Beijing

Beijing, April 25 (Agencies) : Beijing Municipality-i “toilet revolution” inyakyim nung ajemdaker taküm küm metsümeshidak tesem 100 tashi angadi WiFi inoka yanglutsütsü.

Item metsümeshidak tesemtem ya Tongzhou aser Fangshan district tem nung yanglutsü. Iba dak alia ano ATM machines, cellphone tem charge asüba tesem aser electric gari tema yutsütsü, ta Hombarnü Beijing Municipal Commission of City Administration & Environment nung ketdangser Ji Yang-i ashi.

Metsümeshidaksa tanur atema mendena yutsütsü aser ibaji ajanga tetsütem sadema metsümeshitettsü.

Metsü meshidak tesem ka yanglutsü atema china sen 50,000 nungi 100,000 tashi aotsü, ta Ji-i ashi.

Tang yimti nung aliba metsü meshidak tesemtem nunga ventilation aser air condition dena tanurtem tzü intoktsü tesem inoksemtsütsü. Ventilation aser air condition inoktsüba ajanga tsüngküm nung 12 degrees Celsius tashi dang temokong asutsü aser meyi mapang 30 degrees Celsius dang nungi tali tatsükba matutsü, ta pai ashi.