Mexican Open final Anderson aser Del Potro na asayatsü

Acapulco, Metsüremi 03 (Agencies): ATP Mexican Open asayamung nung South Africa nunger Kevin Anderson-i America nunger Jared Donaldson madak 6-3, 4-6, 6-3 agi takok ngutetogo. Iba asayamung Anderson-i akok nungbo, taküm atema pa asoshi iba ya tanububa takok asütsü.
Anderson ya Johannesburg nungi lir, aser hopta ana tejaklen pai New York Open nung takok ngua liasü.
World no. 8 nung alisang Anderson-i Amungnü (Sunday) Argentina nunger Juan Martin Del Porto den final asayatsü asoshi temulunglema lir.
“Taonugnung iba asaya akokba atema ni kanga pelar,” ta Anderson-i ashi. “Court-i aita asayaba mapang, final atema aser taoba asaya nung atalokba tem kecha mebilemer. Iba asaya toktepa asayaba mapang nung ni iba asaya ya kanga dang tasak ta bilema liasü.”
Maneni, tetsür asaya nunga, defending champion Lesia Tsurenko-i iba asayamung nung tukuben tashi atonga takok ngua lir, aser lai Australia tsür Daria Gavrilova madak 6-2, 6-4 agi takok ngutetogo.
Tsurenko-i pezübuba WTA (Women’s Tennis Association) title atema Switzerland tsür Stefanie Voegele den final asaya asoshi maongka ngutetogo. Voegele-i Sweden tsür Rebecca Peterson madak 6-4, 7-6 (7/5) agi takok ngua liasü.
“Ni iba asayamung nung kanga asayaner. Asayamung atema condition ajak ya kanga tajung ta bilemer aser asayartemi idaki asayatsü jangrar,” ta Ukraine tsür Tsurenko-i ashi.