Mexico arrtsü jara: Trump-i court nung raratsü

Washington, Tsüklai/Feb. 16 (Agrencies): Mexico den arrtsü nung jara yanglutsü atema emergency tashi amshitsü lemtetba asoshi Tir Trump ya okadak nokdaktsü.
Congress majangi iba maparen asoshi senotsü ngutettsü atema pai inyakba anema okadak ken o benoktsü ta California aser New York nati shiogo.
Iba arrtsü nung jara yanglutsü ya Trump-i nübuyimba mapang nangzüka liasü.
Democrats temi iba ya tashi tim masüba nung amshi ta ashir aser lenmang ajaklen nungi nokdangtsü merangtsü ta nangzük.
Hokulbarnü Trump-i emergency sangdong den senotsü indoktsüba bill nung meyongnem agütsüba ya tawa sorkar inyakyim kar shibangba ama mataloktsü mechi pai iba mera ya agi.
Emergency sangdongba ajanga pai sen dollar billion aika amshitettsü, koba Congress-i jara atema sen agütsütsü memulungba sülen Trump-i sangdong.
National emergency sangdonger ghonda ishika dang lir mezüng ken o benok.
Liberal advocacy telok, Public Citizen ajanga arem wazüka ayuba tesem ka aser Texas alikibur asem tenüng nung ken o ya benok, kong iba jara ya yanglutsü ta shia liasü.
American Civil Liberties Union (ACLU) ajanga tarutsü anogotem nung meshisadangi ozüng alema tashi amshiba anema ken o benoktsü ta shiogo.
Hokulbarnü Democrats nung lennir anati – House of Representatives Speaker Nancy Pelosi aser Senate Democrat lennir Chuck Schumer – Congress aser court nung tir anema nokdaktsü ta shiogo.
“Timtem maliba ka atema tiri ozüng alema sangdongba ya asen Constitution atema mapa tamajung lir aser iba ajanga kangadang nüngdaka aliba defence sen auyatsü,” ta parnoki sangdong ka nung ashi.
White House Rose Garden nungi sangdongba mapang, iba emergency ajanga pai jara atema sen billion $8 jungnüa ngutettsü, ta Trump-i shia liasü.
Iba sen ya military construction projects aser miim mozü shishilempaba anema raradang indoktsü yua aliba senbong nungi agizüktsü akok.
Saka iba sen ya pai arrtsü mile 2,000 nung jara yanglutsü asoshi sen billion $23 indoktsü ta asadangteta aliba nungi kanga agia tajemba lir.